(මනෝප්‍රිය ගුණසේකර සහ විමුක්ති එස්.රුද්‍රිගු)
විජය පුවත්පත් සමාගමට රුපියල් කෝටි තුනකට අධික වංචාවක් කළැයි කියන දැන්වීම් බාර ගැනීමේ ආයතනයක හිමිකරුවකු බව කියන නලින් ප්‍රසාද් පෙරේරා නැමැත්තා දුටු තැනන අල්ලන ලෙස නියම කරමින් කොටුව මහේස්ත්‍රාත් නිලුපුලී ලංකාපුර මහත්මිය අද වරෙන්තු නිකුත් කළාය.
ණය පදනම මත පුවත්පත් දැන්වීම් පළකරවාගෙන දැන්වීම්වල වටිනාකම වු රුපියල් ලක්ෂ 301ක් සඳහා මුදල් නොමැති ගිණුමකින් චෙක්පත් 20 කට ආසන්න ප්‍රමාණයක් නිකුත් කර වංචා කළැයි කියන සිද්ධියට අදාළ නඩුව කැඳවු අවස්ථාවේදී අධිකරණයේ පෙනී නොසිටීම හේතූවෙන් නලින් ප්‍රසාද් පෙරේරා නැමැත්තාට එරෙහිව මෙලෙස වරෙන්තු නිකුත් කෙරිණී.
මුදල් නොමැති ගිණුමකින් චෙක්පත් 20 කට ආසන්න ප්‍රමාණයක් නිකුත් කර රුපියල් ලක්ෂ 301ක මුදලක් වංචා කළැයි කියමින් කොළඹ ප්‍රදේශයේ දැන්වීම් බාර ගැනීමේ ආයතනයක හිමිකරුවකු බව කියන නලින් ප්‍රසාද් පෙරේරා නැමැත්තාට එරෙහිව රහස් පොලිසියේ වාණිජ හා මුල්‍ය අපරාධ කොට්ඨාශය විසින් පැමිණිල්ලක් ඉදිරිපත් කර තිබිණී.
කොළඹ ප්‍රදේශයේදී දැන්වීම් බාර ගැනීමේ ආයතනයක් පවත්වාගෙන ගොස් ඇති සැකකරු පැමිණිලිකාර විජය පුවත්පත සමාගම මුද්‍රණය කරන පුවත්පත්වල ණය පදනම මත දැන්වීම් පළ කරවාගෙන ඇතැයිද ණය පදනම මත එලෙස පළකරවාගෙන ඇති දැන්වීම්වල වටිනාකම රුපියල් ලක්ෂ 300 කට වැඩි යැයිද අධිකරණයට වාර්තාකර ඇති රහස් පොලිස් නිලධාරීහු එම වටිනාකම සඳහා මුදල් නොමැති ගිණුමකින් චෙක්පත් 20 කට ආසන්න ප්‍රමාණයක් නිකුත් කර ඇතැයිද දැනුම් දී ඇත.
