(පුෂ්පකුමාර මල්ලවආරච්චි)
පස්යාල ගිරිඋල්ල මාර්ගයේ මීරිගම දෙසට ගමන් ගත් මෝටර් රථයක් අද (10) අලුයම පොහොන්නරුව ප්‍රදේශයේදී පාරෙන් ඉවතට පැන ඇලකට වැටීමෙන් සිදු වූ රිය අනතුරකින් තරුණියකු මිය ගොස් තවත් තිදෙනෙකු බරපතල තුවාල ලබා රෝහල් ගතකර ඇතැයි මිරිගම පොලිසිය කියයි.
මෙම අනතුරින් මියගොස් ඇත්තේ මීරිගම මුගුරුගම්පල සංඝමිත්තා මාවත පළමු පටු මගේ පදිංචිව සිටි දිනුෂා නිෂානි විජේසේකර නැමති තිස් හැවිරිදි තරුණියකි.
ඇය නුදුරු දිනයක විවාහ වීමට නියමිතව සිටි තරුණියක බවට ද පොලිසියට තොරතුරු ලැබී තිබිණි.
අනතුරෙන් තුවාල ලබා ඇත්තේ මියගිය තරුණිය ගේ මව පියා හා සහෝදරයකු බව පොලිස් පරීක්ෂණයේදී හෙලිවී ඇත.
මෙම පවුලේ පිරිස කිසියම් අවශ්‍යතාවයක් සඳහා අත්තනගල්ලට ප්‍රදේශයට ගොස් ආපසු නිවස බලා එමින් සිටියදී මෙම අනතුර සිදුවී ඇතැයි හෙළි වී ඇත.
අනතුරින් තුවාල ලැබූ පිරිස මීරිගම රෝහලට ඇතුළත් කරන අවස්ථාව වන විට තරුණිය මිය ගොස් සිටි බව හෙළි වී ඇත.සෙසු තුවාලකරුවන් මේ වන විට වතුපිටිවල මූලික රෝහලට වැඩිදුර ප්‍රතිකාර සඳහා ඇතුළත් කර ඇතැයි පොලිසිය සඳහන් කරයි.
මියගිය තරුණියගේ දේහය පිළිබඳව මරණ පරීක්ෂණය අද 10 සවස මීරිගම මූලික රෝහලේදී පැවැත්වීමට නියමිතය.
