(නිමල් ප්‍රේමචන්ද්‍ර)
කොබෙයිගනේ ප්‍රාදේශීය ලේකම් කොට්ඨාසයේ ගුරුගොඩ ගම්මානයේ පාසල් සිසුවෙක් කොබෙයිගනේ මාවතගම ප්‍රදේශයේදී දැදුරු ඔයේ ගිලී අතුරුදන් වී ඇතැයි කොබෙයිගනේ පොලිසිය පවසයි.
මෙලෙස දැදුරු ඔයේ ගිලී අතුරුදන් වී ඇත්තේ කොබෙයිගනේ හෙංගමුව මහා විද්‍යාලයේ 9 ශ්‍රේණියේ ඉගෙනුම ලබන පී. ජනිත් චතුරංග නැමති 14 වියැති සිසුවෙකි.
ඊයේ (19) දහවල් මෙම සිසුවා සහ ඔහුගේ පන්තියේ ඉගෙනුම ලබන තවත් සිසු සිසුවියන් පිරිසක් එම පන්තියේම සිසුවියකගේ නිවසට උපන්දින සාදයක් සදහා ගොස් ඇති අතර එම පිරිස නිවස ආසන්නයෙන් ගලා බසින දැදුරුඔය බැලීමට ගොස් සිටියදී මෙම අනතුර සිදුව ඇති බව පොලීසිය කියයි.
එහිදී මෙම සිසුවා සහ තවත් සිසුවෙක් දැදුරු ඔයේ අනාරක්ෂිත ස්ථානයකදී ජලයට බැස ඇති අතර ඔවුන් දෙදෙනා ජල පහරට හසුවී තිබේ. පිරිසේ සිටි පිහිනීමට හැකි සිසුවෙක් ජල පහරට හසුවූ එක් සිසුවෙක් බේරාගෙන ඇතත් අනික් සිසුවා මෙසේ දියේ ගිලී ඇත.
කොබෙයිගනේ පොලීසිය නාවික හමුදාවේද සහාය ලබාගෙන ජලයේ ගිලුණු සිසුවාගේ සිරුර සොයාගැනීමට කටයුතු කරමින් සිටින බව කොබෙයිගනේ පොලිස් ස්ථානාධිපති ප්‍රධාන පොලිස් පරීක්ෂක උදය කුමාර මහතා පවසයි.
