(යොහාන් භාසුර)

උසස් පෙළ විභාගය ආරම්භ වන හෙට (23) දිනයේ විදුලි කප්පාදු කර දරුවන්ගේ ජීවිත සමඟ සෙල්ලම් නොකරන්නැයි බලධාරීන්ගෙන් ඉල්ලා සිටින බවත් විභාගය පැවැත්වෙන කාලයේ විදුලිය කප්පාදු නොකරන ලෙස විදුලිබල මණ්ඩලයට ලිපියක් යොමු කළ බවත් මහජන උපයෝගිතා කොමිසමේ සභාපති ජනක රත්නායක මහතා අද (22) පැවසීය.

දරුවන් සමඟ හෝ ආර්ථික සමඟ සෙල්ලම් කිරීමට මෙය සුදුසු කාලයක් නොවන බව කී රත්නායක මහතා විදුලි ඉල්ලුම අඩුවී තිබෙන බැවින් ජල විදුලිය, ගල්අඟුරු සහ පුනර්ජනනීය යන ක්‍රමවේදවලින් අවශ්‍ය විදුලි ධාරිතාවෙන් සියයට 95 ක් සපයාගත හැකි බව ද සදඟන් කළේය.

විභාගය පැවැත්වෙන කාලයේ විදුලිය සැපයීමට ඉන්ධන මිලදීගැනීම සඳහා රුපියල් කෝටි 500 ක් වැයවන්නේ යැයි විදුලිබල හා බලශක්ති අමාත්‍යවරයා කරන ප්‍රකාශ සාවද්‍ය බව කී රත්නායක මහතා පැවසුවේ විදුලිබල ක්ෂේත්‍රය පිළිබඳව දැනුම නැති අමාත්‍යවරයා ඉවත් කර දැනුම ඇති අමාත්‍යවරයෙක් පත්කර අදාල ආයතන අතර සාකච්ඡාවක් කර ප්‍රශ්න විසඳාගැනීමට අවශ්‍ය කටයුතු කරන ලෙස ජනාධිපතිවරයාගෙන් ඉල්ලා සිටින බවත්ය.

උසස් පෙළ විභාගය පැවැත්වෙන ලබන පෙබරවාරි මස 17 වැනිදා දක්වා කාලයේදී රටේ සියලුම ජනතාව විදුලි පරිභෝජනය යම්තාක් දුරටත් අඩු කර රජය, විදුලිබල මණ්ඩලය සහ මහා භාණ්ඩාගාර අනිවාර්යෙන්ම සහයෝග දී අනාගත පරම්පරාවට මේ අවස්ථාවේදී සහයෝගය දියයුතු බවත් විභාගය කාලයේදී පස්වරු 3.00 සිට රාත්‍රී 7.00 දක්වා කාලයේදී පමණක් විදුලිය කැපීම මගින් ද විදුලිබල මණ්ඩලයට සහයෝගය දැක්විය හැකි බවත් ඒ මහතා කීය.

කැබිනට් මණ්ඩලයේ විදුලි බිල ඉහළ දැමීමේ නීති විරෝධී යෝජනාවට පසුගිය 12 වැනිදා කැමති වී 19 වැනිදා අකමැති වූ එම කොමිසමේ සාමාජිකයන් අනිද්දා පැවැත්වෙන අධ්‍යක්‍ෂ මණ්ඩල රැස්වීමේදී සහයෝගය දෙනු ඇතැයි බලාපොරොත්තු වන බවත් එම සාමාජිකයන්ගේ තීරණය දේශපාලන බලපෑම් මත වෙනස් කළ එකක් බවත් රත්නායක මහතා සදඟන් කළේය.

මහජන උපයෝගිතා කොමිසමේ සභාපති ජනක රත්නායක මහතා කොළඹදී අද (22) පස්වරුවේ විශේෂ මාධ්‍යහමුවක් පවත්වමින් එසේ පැවසීය.