‘මා ජාතිවාදියෙක් නොවෙයි. මම සිංහල බෞද්ධයෙක් කියා කියන්න පසුබට වෙන්නෙත් නෑ. අපි අපේ දරුවන්ට මොනවද දිය යුත්තේ? අපි අන්‍ය ආගම්වලට ගරු කරන ගමන් තමන්ගේ ආගමට භක්තිය ගෞරවය ලැදියාව දැක්විය යුතුයි. එහෙම කරන්න අපට ශක්තිය, ධෛර්යය තිබිය යුතුයි.‘ යි මහින්ද රාජපක්ෂ හිටපු ජනපති අද (19) මහ නුවර දී පැවසීය.

ජාතික පිරිවෙන් දිනය වෙනුවෙන් මහනුවර දළදාමාලිගයේ පැවැති පිංකමකට සහභාගී වූ ජනපති ‘රැජින‘ හෝටලය ඉදිරිපිට රැස්ව සිටි පිරිස අමතමින් එසේ කීවේය.

‘අද මොන තරම් නිදහසක් තිබෙනවාද? එදා බෝම්බ බයෙන් හිටියා. අද මෙම ස්ථානයට එක් රොක්වූ ජනතාව බයක් සැකක් නැතිව ඉන්නවා. ශ්‍රී දළදා මාළිගාවට බෝම්බ ප්‍රහාරයක් එල්ල වුවා මතකද? අද සමහරුන්ට ඒක අමතකයි. මේ දළදා මාළිගාව ආරක්ෂා කරන්න අවශ්‍ය නිසයි වැටවල් ගසා ගේට්ටු දමා වැහුවේ.‘ යැයි ද හිටපු ජනපති කිවේය.