ඉසුරු සොයා කුවේට් ගොස් නිසි වැටුප් නොලැබීම, හාම්පුතුන්ගේ අතවර, ශාරිරික වද හිංසා ආදියට ලක් වූ ගෘහ සේවකාවෝ 78 දෙනෙක් ද පිරිමි විසි දෙදෙනෙක් ද, අද අලුයම හිස් අතින් ආහ. කෙස් කළඹ බලෙන් කපා දැමුණු අය ද, ඇඟට උණු තෙල් දමා පිළිස්සුම් තුවාල ලද අය ද, කාමාතුරයන්ගෙන් බේරීම සඳහා පැන ගිය අය ද ඒ අතර වූහ. කුවේට් රජයේ මුදලින් ආ මේ අයට යළි අරාබියේ රැකියාවට යාමට නොහැකිය. තවත් ගෘහ සේවිකාවෝ 471 දෙ‍දෙනක්  ද , සේවකයෝ 40 දෙනෙක් ද ගමරට බලා ඒමේ සුදානමින් එරට ශ්‍රී ලංකා තානාපති කාර්යාලය බාරයේ සිටිති.