(මනෝප‍්‍රිය ගුණසේකර)
හෙළි නොකරන ආකාරයකින් රුපියල් කෝටි තුනක මුදලක් උපයා ගත් බවට මුදල් විශූද්ධිකරණ පනත යටතේ පාර්ලිමෙන්තු මන්ත්රී නාමල් රාජපක්‍ෂ මහතා ඇතුළු පිරිසකට එරෙහිව මුල්‍ය අපරාධ විමර්ශන කොට්ඨාශයෙන් පරීක්‍ෂණ ආරම්භ කළ පසු බොස්ටන් කැපිටල් සමාගමට එවු බව කියන සැළසුමේ පිටපතක් නාමල් රාජපක්‍ෂ මහතා වෙනුවෙන් පෙනී සිටින නීතීඥවරයාට ලබාදෙන ලෙස කොළඹ මහාධිකරණ විනිසුරු සම්පත් අබේකෝන් මහතා කොළඹ මහාධිකරණයේ ලේඛාධිකාරීවරයාට අද (30) නියම කළේය.
ගවර්ස් කෝපරේට් සර්විසස් සමාගමෙන්, බොස්ටන් කැපිටල් සමාගමට සැළසුමේ පිටපතක් එව්වා නේදැයි බොස්ටන් කැපිටල් සමාගමේ සභාපති රොහාන් අබේ ඊරියගොල්ල මහතාගෙන් හරස් ප‍්‍රශ්නයක් නැඟූ නාමල් රාජපක්‍ෂ මහතා වෙනුවෙන් පෙනී සිටි ජනාධිපති නීතීඥ ගාමිණි මාරපන මහතා නැඟු අවස්ථාවේදී මේ පිළිබඳ පරීක්‍ෂණ ආරම්භ කළ පසු සැළසුමේ පිටපතක් තමන්ට එවු බව පිළිගැනීමෙන් අනතුරුව කළ ඉල්ලීමක් පිළිගත් විනිසුරුවරයා එලෙස නියම කළේය.
2013 ඔක්තොම්බර් මස පළමුවැනිදාත් 2014 අගෝස්තු මස 31 වැනිදාත් අතර කාලය තුළ කොළඹදී පාර්ලිමෙන්තු මන්ත්රී නාමල් රාජපක්‍ෂ මහතාට අයත් ගවර්ස් කෝපරේට් සර්විසස් සමාගම වෙනත් සමාගමක් සමඟ කළ ගණුදෙණුවකදී අයුතු ලෙස මුදල් උපයාගැනීමට කුමන්ත‍්‍රණය කිරීම, ඒ අනුව රුපියල් මිලියන 30ක මුදලක් උපයාගත් බවට මුදල් විශූද්ධිකරණ පණත යටතේ විත්තිකරුවන්ට එරෙහිව චෝදනා එකොළහක් යටතේ නීතීපතිවරයා විසින් නඩු පවරා තිබිණි.
එලෙස හෙළි නොකරන ආකාරයකින් හා අයථා ලෙස උපයන ලද රුපියල් මිලියන 30ක මුදලකින් ‘‘හෙලෝ කෝප්’’ ආයතනය මිලදී ගෙන ඇති බවටද නීතීපතිවරයා විසින් විත්තිකරුවන්ට එරෙහිව වැඩිදුරටත් චෝදනා නඟා තිබිණි.
දුෂණ විරෝධී පෙරමුණේ කැදවුම්කරු වසන්ත සමරසිංහ මහතා විසින් මුල්‍ය අපරාධ විමර්ශණ කොට්ඨාශයට කරන ලද පැමිණිල්ලකට අනුව කරන ලද විමර්ශණයකින් අනතතුරුව නීතීපතිවරයා විසින් විත්තිකරුවන්ට එරෙහිව මෙම නඩුව පවරා ඇත.
පාර්ලිමේන්තු මන්ත්රී නාමල් රාජපක්‍ෂ මහතා, පවිත‍්‍රිකා සුජානි බෝගොල්ලාගම සහ ගුවන් සේවිකාවක් වු නිත්‍යා සේනානී සමරනායක, ඔරනෙල්ලා ඉරේෂා සිල්වා සහ ඉන්දික ප‍්‍රභාත් කරුණාජීව නමැත්තන්ට එරෙහිව මෙම නඩුව පවරා ඇත.
කොළඹ මහාධිකරණ විනිසුරු සම්පත් අබේකෝන් මහතා හමුවේ මෙම නඩුව විභාග කරන ලදී.
