(නිමන්ති රණසිංහ)

ජාතික වෙසක් දිනය නිමිත්තෙන් සිරකරුවන් 260 දෙනකුට ජනපති සමාවෙන් නිදහස ලබා දී  ඇතැයි බන්ධනාගාර කොමසාරිස් (පාලන) මාධ්‍ය ප්‍රකාශක චන්දන ඒකනායක මහතා පැවසිය.

මෙලෙස විශේෂ රාජ්‍ය සමාව හිමිවී ඇති සිරකරුවන් අතර ජීවිතාන්තය දක්වා වූ සිරදඩුවම් ලැබූ රැදවියන් 53 දෙනකු ද සිටින බව ඔහු සඳහන් කළේය.

ජීවිතාන්තය දක්වා වූ සිරදඩුවම් ලැබූ රැදවියන් හට වසර 19කට පසු ජනපති සමාව ලැබූ පළමු අවස්ථාව මෙය බවද හෙතෙම පැවසීය.

වර්ෂ 2002න් පසු ජීවිතාන්තය දක්වා සිරදඩුවම් ලැබූ රැදවියන් 257 දෙනකුගේ එම දඩුවම අහෝසි වී සාමාන්‍ය සිරකරුවන් බවට පත් කර ඇති අතර ඉන් 53 දෙනකු වෙසක් දිනය නිමිත්තෙන් එසේ නිදහස් කළ බව ද මාධ්‍ය ප්‍රකාශකවරයා සදහන් කළේය.

ජීවිතාන්තය දක්වා සිරදඩුවම් නියමව සිරදඩුවම් ලිහිල් වූ 247 දෙනා වසර 20කට වැඩි සිරදඩුවම් විඳි අයවලුන් වෙති.

මෙම සමාවන් හිමිවන සිරකරුවන් නිදහස් කිරීමේ දී අනුගමනය කල යුතු සෞඛ්‍ය  මාර්ගෝපදේශ හා වෛද්‍ය නිර්දේශයන්ට අනුව ඔවුන් නිදහස් කෙරෙනු ඇතැයි ද බන්ධනාගාර මාධ්‍ය ප්‍රකාශකවරයා පැවසීය.