(එස් හේරත් සහ ශ්රීනාත් ප්රසන්න ජයසූරිය )
මාදම්පේ මැදගම ප්රදේශයට අද (12) දහවල් වල්අලි රංචුවක් කඩා වැදී ඇති බව වාර්තා වෙයි.
අලි හයදෙනකු සහ එක් ඇතකුගෙන් සමන්විත මෙම අලි රංචුව මැදගම කොටකන්ද කුඩාබිංගිරිය ආදී ප්රදේශවල සැරිසරමින් වගාවන්ට හානි සිදු කරමින් සිටින බවද වාර්තා වෙයි.
මෙම අලි රංචුව හලාවත මුන්නේෂවරම ප්රදේශයේ ඊයේ ගැවසී ඇති බවටද තොරතුරු වාර්තා විය. මුන්නේෂවරම ප්රදේශයේ සැරි සැරූ අලි රංචුව මේ වන විට මැදගම ප්රදේශයට පැමිණ ඇතැයි දේශවාසීහු සැක පළ කරති.
මේ වන විට අලි රංචුව පොල් වතුවලට කඩාවැදී පොල් වගාවට හානි සිදුකරමින් සිටී. වල් අලින්ගෙන් මෙතෙක් එම ප්රදේශයේ ජනතාවට හෝ වෙනත් දේපල වලට කිසිදු හානියක් සිදු වී නොමැති බවත් මැදගම කොකන්ද ප්රදේශයේ මාර්ගයක යතුරුපැදියකින් ගමන් කරමින් සිටි පුද්ගලයකු අලි රංචුව දැක බියට පත්ව යතුරුපැදිය අතහැර දමා පලා ගොස් ඇති අතර යතුරුපැදියකට අලි රංචුව විසින් පහරදී ඇති බවද වාර්තා වෙයි.
මේ පිළිබඳව ප්රදේශවාසීන් පුත්තලම වන ජීවි කාර්යාලයට දැනුම් දීමෙන් පසු එම කාර්යාලයේ නිලධාරීන් පිරිසක් පැමිණ අලි රංචුව ප්රදේශයෙන් පලවා හැරීමට කටයුතු කරමින් සිටින බවද ප්රදේශවාසීහු පවසති.
(ඡායාරූපය- හිරාන් ප්රියංකර)
