(සුජිත් හේවාජුලිගේ සහ අංජුල මහික වීරරත්න)

පාර්ලිමේන්තු මන්ත්‍රීවරුන් හා පාර්ලිමේන්තු කාර්ය මණ්ඩලයේ සාමාජිකයන් සඳහා අහඹු ක්ෂණික ප්‍රතිදේහජනක පරීක්ෂණ (රැපිඩ් ඇන්ටිජන්) වටයක් ලබන 17 වැනිදා අඟහරුවාදා පෙරවරු 9.00 සිට දහවල් 12.30 දක්වා පැවැත්වීමට කටයුතු සුදානම් කර ඇතැයි වේත්‍රධාරී නරේන්ද්‍ර ප්‍රනාන්දු මහතා පැවැසීය.

ආසාදිතයන් හමුවී ඇති ප්‍රදේශවල සිට පැමිණෙන නිලධාරීන් මෙම පරීක්ෂණ වලට භාජනය කිරීම වඩාත් සුදුසු බව සෞඛ්‍ය අංශ නිර්දේශ කර ඇතැයිද හෙතෙම සඳහන් කළේය.

කොවිඩ් වසංගත තත්වය හමුවේ සෞඛ්‍ය අංශ පාර්ලිමේන්තු ප්‍රධානින්ට ලබා දී ඇති උපදෙස් අනුව පාර්ලිමේන්තු මන්ත්‍රීවරුන්ගේද පාර්ලිමේන්තු මහ ලේකම් කාර්ය මණ්ඩලය හා අනුබද්ධ කාර්ය මණ්ඩල නිලධාරීන්ගේ හා පාර්ලිමේන්තු ජනමාධ්‍යවේදීන්ගේද සෞඛ්‍ය ආරක්ෂාව තහවුරු කිරීමේ අරමුණින් මෙම පරීක්ෂණ වටය ක්‍රියාත්මක කෙරේ.

මෙය සෞඛ්‍ය අමාත්‍යාංශයේ මැදිහත්වීමෙන් පාර්ලිමේන්තු සංකීර්ණයේදී කෙරෙන කොරෝනා පරීක්ෂණ හය වැනි වටයයි.

මේ අතර පාර්ලිමේන්තු මන්ත්‍රීවරු විස්සකට වැඩි පිරිසක් සහ පාර්ලිමේන්තු සේවකයෝ විශාල පිරිසක් කොවිඩ් රෝගයට පසුගිය දිනවල ගොදුරු වූහ.