(නිමන්ති රණසිංහ)
ගාලුමුවදොර සහ අරලියගහ මන්දිරය ඉදිරිපිට පැවැති සාමකාමී විරෝධතා ව්‍යාපාරවල සිටි පිරිසට පහරදීමේ සිද්ධියට අදාළ විමර්ශනවලට බාධා වන බව සඳහන් කරමින් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා වෙනත් ප්‍රදේශයකට ස්ථාන මාරු කර යවන ලෙසට නිතිපතිවරයා විසින් පොලිස්පතිවරයාට උපදෙස් ලබාදෙනු ලැබ තිබියදීත් එම උපදෙස් ක්‍රියාත්මක නොකිරීම සම්බන්ධයෙන් වහාම අධිකරණයට කරුණු ඉදිරිපත් කරන ලෙසට කොළඹ කොටුව මහේස්ත්‍රාත් තිළිණ ගමගේ මහතා පොලිස්පති සී. ඩී’. වික්‍රමරත්න මහතාට අද (25) නියම කළේය.
පොලිස් දෙපාර්තමේන්තුවේ සාක්ෂිකරුවන් එකී නිලධාරියා යටතේ සේවය කිරීම හේතුවෙන් ඔහු ස්ථාන මාරුකරන ලෙසට නිතිපතිවරයා ඉකුත් මැයි මස 23 වැනිදා ලබා දෙන ලද නිතිපති උපදෙස්වලින් පැහැදිලි වන්නේ බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා තවදුරටත් එම තනතුරේ සිටීම මෙම විමර්ශනයට බාධාවක් බවට නිතිපතිවරයා පිළිගෙන ඇතැයි මහේස්ත්‍රාත්වරයා විවෘත අධිකරණයේදී සඳහන් කළේය.
එසේ නම්, නිතිපති උපදෙස් ප්‍රකාරව එකී නිලධාරියා මෙතෙක් ස්ථාන මාරුකිරීමක් සිදු නොකළේ මන්දැයි යන්න සම්බන්ධයෙන් වහාම අධිකරණයට කරුණු ඉදිරිපත් කරන ලෙසට මෙහිදී මහේස්ත්‍රාත්වරයා පොලිස්පතිවරයාට නියෝග කළේය.
