ශ්‍රී ලංකාවේ ප්‍රකට ව්‍යාපාරිකයකු වූ කැලණිය දළුගම දාස ව්‍යාපාරයේ නිර්මාතෘ එස් ඩී ගුණදාස මහතා (83) අභාවප්‍රාප්ත විය.

ශ්‍රී ලංකා නිදහස් පක්ෂයේ ආරම්භක සාමාජිකයකු වූ දාස මුදලාලි මාතර තලල්ලේ ඉපදී හැත්තෑව දශකයේ කොළඹ ප්‍රමුඛ පෙළේ ව්‍යාපාරිකයකු විය.

ඔහුගේ දේහය කොළඹ ජාවත්ත පාරේ අංක අට දරණ ස්ථානයේ තැන්මත් කර ඇත. අවසන් කටයුතු බ්‍රහස්පතින්දා (10) සවස හතරට බොරැල්ල කනත්තේ දී සිදු කිරීමට නියමිතය.

1931 සැප්තැම්බර 05 වැනි දා සුන්න දෙනියේ ගුණදාස (දාස මුදලාලි) තලල්ලේ දී ඉපදුණේය. ඔහුගේ පියා එස් ඩී රොමානිස් සිල්වා මහතාය. මව කළුහාමි මාතාවයි. සහෝදරයන් තිදෙනකුගේත් සහෝදරියකගේත් පවුලේ බාලයා වූයේ ගුණදාස මහතාය.

මවගේ සැකැස්ම හා සකසුරුවම් ගතිය ඔහුගේ ව්‍යාපාරවල පදනම වන්නට ඇතැයි ඔහුගේ සාර්ථකත්වය පිළිබඳ ඩේලිනිවුස් පුවත්පතට ලිපියක් ලියූ කලාකීර්ති එඩ්වින් ආරියදාස මහතා කියයි.

මව ගමේ දී ලනු ඇඹරීම සංවිධානය කළ ආකාරයත්, පසුව එය පාඩමකට ගෙන පාසල් කාලයේ ළමයිනට පැන්සල් කොපිපොත් ආදිය විකුණා යම් මුදලක් සොයා ගැනීමත් දාස මුදලාලිගේ චරිතයේ කැපී පෙනන ලක්ෂණයක් විය

ශ්‍රී ලංකාවේ සුපිරි වෙළෙඳහලක් වීම ආරම්භ කරන ලද්දේ දාස මුදලාලි විසිනි. ඔහු තලල්ලේ සිට කොළඹ අවුත් බඩු පෙට්ටි හිසේ තබාගෙන සෙරප්පු දෙකක්වත් නැතිව කොළඹ වීදි ගානේ ගියේය. ඉන් පසු අත් කරත්තයක බඩු පටවාගෙන ගියේය.

ටිකෙන් ටික ඔහුගේ ව්‍යාපාර දියුණු වෙද්දී සහෝදරයෝද කොළඹට ආහ.

ඔහුගේ සුවිශේෂ ලක්ෂණයක් වූයේ දවසේ වෙළෙඳාම් වියදම හා ලාභය පොතක සටහන් කිරීමය. ලාබයක් ලද විටක ඔහු සත හැටකට බුරියානි පිඟානක් මිලට ගත්තේය. ඒ රාත්‍රී ආහාරයටය. ඩියූරෝ කමිසය හඳුන්වා දුන් ඔහු ශ්‍රී ලංකාවේ ඇඟළුම් කර්මාන්තයේ ද පුරෝගාමියෙක් විය.. ඉන් පසු ඔහු ලොව සුප්‍රකට පියරේ කාර්ඩින් කමිසය ශ්‍රී ලංකාවේ නිපදවීමේ අවසරය ද ලබා ගත්තේය.

ආගමට දහමට නැඹුරු ජීවිතයක් ගත කළ ඔහු ඒවායේ දියුණුවට බෙහෙවින්ම අතහිත දුන්නේය.

මාතෘ නිවාස, පෙර පාසල් හා වැඩිහිටි නිවාසවලට ද ඔහුගේ ආධාර නොමසුරුව ලැබිණි.

ඔහුගේ බිරිය ද ඔහුගේ ගමේම කාන්තාවකි.