(බී. ජී. චතුරංග )

දකුණු පාළාතේ සිදු කළ ඝාතන තුනකට සම්බන්ධ  වෙඩික්කරුවෙකු ඇතුළු සැකකරුවන්  තිදෙනකු රුපියල් ලක්ෂ 25කට වැඩි හෙරොයින් මත්කුඩු  සමඟ, අත්අඩංගුවට ගත් බව  අනුරාධපුර කොට්ඨාස අපරාධ විමර්ශන කාර්යාංශය පවසයි.

මෙලෙස  අත්අඩංගුවට පත්ව ඇත්තේ අවුරුදු 44 ක් පමණ වයසේ පසුවන අම්බලන්ගොඩ ප්‍රදේශයේ පදිංචිව සිට දැනට අනුරාධපුර  හොරොව්පොතාන  නෙළුගොල්ලෑව  ප්‍රදේශයේ පදිංචිව සිටින  යුද හමුදා සේවය අතහැර ගිය පුද්ගලයෙකු හා අවුරුදු 40 සහ 30 වයසැති යාය3, නෙළුගොල්ලෑව මැදවච්චිය ප්‍රදේශයේ සහ අනුරාධපුර පෙරිමියන්කුලම  ප්‍රදේශයේ පදිංචි  මත්ද්‍රව්‍ය ජාවාරම්කරුවන් තිදෙනෙකි.

මෙම සැකකරුවන් තිදෙනා අතර සිටි ඝාතන තුනක වෙඩික්කරුවෙකු ලෙස කටයුතු කල  යුද හමුදාව හැර ගිය සැකකරු  අනුරාධපුර - යාපනය හන්දිය ප්‍රදේශයේදී  අත්අඩංගුවට ගත් බවත් එම සැකකරු ඩුබායි රාජ්‍යයේ සැගව සිටින  සංවිධාන අපරාධකරුවෙකු යටතේ අනුරාධපුර දිස්ත්‍රික්කය තුළ හෙරොයින් ජාවාරම් සිදු කරන අයෙකු බවට හඳුනා ගෙන ඇති බවද පොලිසිය කියයි.

මෙම සැකකරු අත්අඩංගුවට පත්වන විට හෙරොයින් ග්‍රෑම් 88යි මිලිග්‍රෑම් 490ක් සන්තකයේ තිබි හමුවූ  බවද පොලිසිය පවසයි. අත්අඩංගුවට ගත් අනෙක් සැකකරුවන්  දෙදෙනා සන්තකයේ තිබී හෙරොයින් මත්කුඩු ග්‍රෑම් 17 මිලිග්‍රෑම් 800ක ප්‍රමාණයක් සොයා ගත් බව පොලිසිය සඳහන් කළේය. මෙම සැකකරුවන් තිදෙනා අද  (28) අනුරාධපුර මහෙස්ත්‍රාත් අධිකරණයට ඉදිරිපත් කිරීමට නියමිතව සිටියහ.