( මොහොමඩ් ආසික්)
අකුරණ හතේ කණුව ප්‍රදේශයේ පැවැති ක්‍රිකට් තරඟයක් සඳහා මාතලේ ප්‍රදේශයේ සිට පැමිණ සිටි ක්‍රිකට් කණ්ඩායමක තරුණයන් පරිසකට අයත් රුපියල් 5,85,000 ක් පමණ වටිනා ජංගම දුරකථන අටක් සොරකම් කර එයින් රුපියල් ලක්ෂ දෙකක් පමණ වටිනා දුරකථන දෙකක් රුපියල් අට දහසකට විකුණා කුඩු ගැසූ සැකකරු ඇතුළු තිදෙනකු අලවතුගොඩ පොලීසිය මගින් අත් අඩංගුවට ගනු ලැබ තිබේ.
අකුරණ හතේකණුව ප්‍රදේශයේ ක්‍රීඩාංගණයක පැවැති ක්‍රිකට් තරඟයක් සඳහා සහභාගි වීමට පැමිණි මාතලේ ප්‍රදේශයේ ක්‍රිකට් කණ්ඩයමකට අයත් තරුණයන් පිරිසක් තමන්ගේ ජංගම දුරකථන අටක් මල්ලක දමා ත්‍රී රෝද රථයක තබා තරඟය සඳහා සහභාගි වී තිබේ. තරඟය අවසන්ව පැමිණ ජංගම දුරකථන ගැන සොයා බැලීමේදී එම දුරකථන ත්‍රී රෝද රථයේ නොමැති බව හෙළි වී තිබේ. පසු දින මෙම තරුණ පිරිස පොලීසියට පැමිණ සිද්ධිය සම්බන්ධයෙන් පැමිණිලි කර තිබේ.
ඒ අනුව පරීක්ෂණ පැවැත්වූ පොලීසිය සීසීටීවී කැමරා දර්ශණ ඔස්සේ සැකකරු හඳුනා ගෙන අත් අඩංගුවට ගෙන තිබේ. ඔහු මෙම ජංගම දුරකථන අට සොරා ගෙන එයින් රුපියල් ලක්ෂ දෙකක් පමණ වටිනා ජංගම දුරකථන දෙකක් එක් පුද්ගලයකුට රුපියල් අට දහසකට විකුණා ඇති අතර එම මුදල්වලින් ඔහු හෙරොයින් පානය කර ඇති බවත් අනාවරණය කර ගෙන තිබේ.
