ශ්‍රී ලංකාවේදී පැහැරගත් බව කියන ඕස්ට්‍රේලියා පුරවැසියකු වන ප්‍රේමකුමාර් ගුණරත්නම්ගේ (42) ඉරණම ගැන ‘වහා පැහැදිලි කිරීමක් කරන ලෙස ඕස්ට්‍රේලියා රජය ශ්‍රී ලංකාවෙන් ඉල්ලයි. ජනතා විමුක්ති පෙරමුණෙන් කැඩී ගිය පෙරටුගාමී සමාජවාදී පක්ෂයේ රැස්වීමක් පැවැත්වීමට තිබියදී ඔහු කිරිබත්ගොඩදී ගිය සිකුරාදා අතුරුදන්වී යැයි ඔහුගේ පවුලේ සාමාජිකයෝද, පක්ෂ ක්‍රියාකාරීහුද කියති. ගුණරත්නම් ද, නව පක්ෂයේ කාන්තා අංශ නායිකා දිමුතු ආටිගලද ආරක්ෂක බලධරයන් විසින් පැහැරගන්නා ලදැයි පෙරටුගාමී සමාජවාදී පක්ෂය චෝදනා කරයි. ගුණරත්නම් පැහැරගන්නට ඇතැයි කියන තොරතුරු ලැබී ඇතැයි ඕස්ට්‍රේලියා විදේශ කාර්යාලයය පවසයි. මේ තත්ත්වය වහා පැහැදිලි කරන්නැයි අප ශ්‍රී ලංකාවෙන් ඉල්ලා සිටියා‘ යැයි ඕස්ට්‍රේලියා විදේශ අමාත්‍යංශ ප්‍රකාශිකාවක ප්‍රංශ  පුවත් සේයට කීවාය. දෙමළ ජාතිකයකු වන තම සැමියා කොටි සංවිධානය හා ඇයි හොඳයි කමක් නොතිබූ බව ගුණරත්නම්ගේ බිරිය චම්පා සෝමරත්න පැවසුවාය. ‘ඔහු අත්අඩංගුවට ගෙන ඇත්තේ උදේ රැයින්. සන්නද්ධ වූ 25 දෙනකු පමණ ඔහුගේ ගෙට ඇතුළු වී තිබෙනවා. විදුලි පහන් නිවා දොර ජෙනෙල් වසා ගන්නැයි ඔවුන් අසල්වැසියනට තර්ජනය කැර ඇතැයි ඇය ඕස්ටේලියාවේ ඒ.බී.සී ගුවන් විදුලියට කීවාය. ‘ශ්‍රී ලංකාවේ නීති විරෝධී පැහැර ගැනීම් හා මානව හිමිකම් කඩ කිම් පවතින තත්ත්වයක තම සැමියා නව පක්ෂය පිහිටුවන බවද ඇය කියා ඇත. ඕස්ට්‍රේලියාවේ ශ්‍රී ලංකා මහ කොමසාරිස් තිසර සමරසිංහ කියා ඇත්තේ ‘රජය පුද්ගලයන් පැහැර නොගන්නා බවයි. ඒහෙම නමක් ඇති පුද්ගලයකු අත්අඩංගුවට ගෙන නැතැයිද ඔහු කීවේය. ඕස්ට්‍රේලියා ගමන් බලපතක් ඇති ගුණරත්නම් නම් පුද්ගලයකු මෑතකදී අත්අඩංගුවට ගෙන නැතැයි කියන මහා කොමසාරිස් ඔහු හොරෙන් ශ්‍රී ලංකාවට ඇතුඵ වන්නට ඇත්දැයි ප්‍රශ්න කරයි. පවුලේ සාමාජිකයන්ගෙන් ලැබුණු තොරතුරු විශ්වාසදැයි සොයන බව මහ කොමසාරිස් කියයි. හොංකොං නුවර ආසියා මානව කොමිසම කනස්සල්ල පළ කරමින් පැවසුවේ ගුණරත්නම්ගේ පක්ෂයේ කටයුතු ගැන රජය හා ආරක්ෂක අමාත්‍යංශය සැලකිලිමත් වූ බව රහසක් නොවන බවයි.