ඕමානයේ ගෘහ සේවිකාවක ලෙස සේවයට ගොස් සිටිය දී හාම්පුතුගේ කෙළෙසීමට ලක්වීයැයි කියන ශ්රී ලාංකික ගෘහ සේවිකාවක බලහත්කාරයෙන් ගබ්සාවට ලක්කිරීමෙන් සිදුවූ හානියට රුපියල් කෝටියක වන්දියක් ඉල්ලා එම ගෘහ සේවිකාව ගොනු කළ මූලික අයිතිවාසිකම් පෙත්සම ලබන සැප්තැම්බර තුන් වැනි දා සලකා බැලීමට ශ්රේෂ්ඨාධිකරණය තීන්දු කළේය.
අම්පාර මහ ඔය පදිංචි 29 හැවිරිදි විවාහක කාන්තාවක ගොනු කළ මෙම පෙත්සම චන්දා ඒකනායක, ප්රියන්ත ජයවර්ධන සහ උපාලි අබේරත්න යන ශ්රේෂ්ඨාධිකරණ විනිසුරු වරුන් හමුවේ කැඳැවිණි.
විදේශ සේවා නියුක්ති කාර්යංශය, එහි සභාපති, නියෝජ්ය සාමාන්යාධිකාරී, ඕමාන් ශ්රී ලංකා තානාපති කාර්යාලයයේ තෙවැනි ලේකම් නිලෝමි කන්නන්ගර, එම තානාපති කාර්යාලයයේ සුරක්ෂා නිවසේ පාලිකා ෂමීරා නිලක්ෂණී, ළමා හා කාන්තා කාර්යංශයේ සහකාර පොලිස් අධිකාරිනී ලංකා රාජිනී සහ නීතිපති ඇතුළු 11 දෙනෙක් වගඋත්තරකරුවෝ ලෙස නම් කරනු ලැබ සිටිති.
වගඋත්තරකරුවන් විසින් තමන්ට ජීවත්වීමේ අයිතිය සහ නීතිය ඉදිරියේ සමාන ලෙස සැලකිලි ලැබීමේ අයිතිය කඩ කර ඇති නිසා පෙත්සම විභාගයට ගන්නා ලෙස ද, අදාළ තානාපති නිලධාරීන්ට එරෙහිව ස්වාධීන පරීක්ෂණයක් පවත්වීමට නියෝග කරන ලෙස ද ඇය අධිකරණයෙන් ඉල්ලා සිටින්නීය.
