අනීෂා මානගේ
රත්ගම බූස්ස ප්රදේශයේදී පැහැරගෙන ගොස් ඝාතනය කළේ යැයි කියන ව්යාපාරිකයන් දෙදෙනාගේ යැයි සැකකරන තවත් අස්ථි කොටස් කිහිපයක් වලස්මුල්ල හැවැන්දෙණිය රක්ෂිතයෙන් සොයා ගත් අතර වලස්මුල්ල මහේස්ත්රාත් අධිකරණයේ ප්රධාන මහේස්ත්රාත් සුරංග මුණසිංහ මහතා අද (26) එම ස්ථානයට පැමිණ මහේස්ත්රාත් පරීක්ෂණය පැවැත්වීය.
මෙම ව්යාපාරිකයන් දෙදෙනා ඉකුත් ජනවාරි 23 දින දකුණු පළාත් විශේෂ අපරාධ මෙහෙයුම් ඒකකයේ නිලධාරීන් විසින් පැහැරගෙන ගොස් ඝාතනය කළ බවට අපරාධ පරීක්ෂණ දෙපාර්තමේන්තුවේ නිලධාරීන් සිදුකළ පරීක්ෂණ වලදී හෙළිවී තිබිණි.
මෙම ඝාතන සිද්ධිය සම්බන්ධයෙන් සැකකරුවන් කිහිප දෙනෙකු අත්අඩංගුවට ගෙන තිබූ අතර එම සැකකරුවන්ගෙන් කරන ලද ප්රශ්න කිරීම් වලදී අනාවරණය වූ කරුණු අනුව පරීක්ෂණ පැවැත්වූ අපරාධ පරීක්ෂණ දෙපාර්තමේන්තුවේ නිලධාරීහු වලස්මුල්ල මැදගම්ගොඩ සිට පිස්සුබැද්ද දක්වා වැටී ඇති මාර්ගයේ හැවැන්දෙණිය රක්ෂිතයේ තුන්මෝදර ඇළ මාර්ගයේ අතුරු ඇළ මාර්ගයක තිබී පිළිස්සුණු අස්ථි කොටස්, මාංශ කොටස් කිහිපයක් සහ දත් කොටස් කිහිපයක් ඉකුත්දා (22) සොයා ගත්හ.
ඝාතනයට ලක්වූ පුද්ගලයන්ගේ යැයි සැකකරන දිගින් සෙන්ටිමීටර එකත් හතරත් අතර ප්රමාණ වලින් යුතු අස්ථි කොටස් කිහිපයක් යළි සොයාගෙන තිබිණි. ඉකුත්දා සොයාගත් පිළිස්සුණු අස්ථි කොටස් හමුවූ ස්ථානයේ සිට මීටර 4 ක් පමණ දුරින් මෙම අස්ථි කොටස් කිහිපය තිබී සොයා ගෙන තිබේ.
ඝාතනය කළේ යැයි කියන ව්යාපාරිකයන් දෙදෙනා වලස්මුල්ල හැවැන්දෙණිය රක්ෂිතයේ සිඳී ගිය තුන්මෝදර ඇළ මාර්ගයේ දමා පුළුස්සා ඇතැයි පොලිස් නිලධාරීහු සැකකරයි.
