(රෝෂන් තුෂාර)
ලංකා ප්රීමියර් ලීග් එල්.පි.එල්. 2020 ක්රිකට් තරඟාවලියේදී මුදලට තරඟ පාවාදීමට ක්රීඩකයන්ට බලපෑම් කළේ යැයි කියන දඹුල්ල තන්ඩර්ස් ක්රීඩා සමාජයේ ප්රධාන පරිපාලන නිලධාරී ඉන්දීය ජාතික අසීස් හෙර්ළි සැකකරුට දෙසැම්බර් 25 දිනට පෙර ක්රීඩා දූෂණය වැළැක්වීමේ ඒකකයේ පෙනී සිට ප්රකාශයක් ලබා දෙන්නැයි නියෝග කරමින් කොළඹ ප්රධාන මහේස්ත්රාත් අසංග එස් බෝදරගම මහතා නොකීසී නිකුත් කළේය.
ක්රිකට් ක්රීඩක සචිත්ර සේනානායක හා අසීස් හෙර්ළි සැකකරුවන් කරමින් ක්රීඩා දූෂණය වැළැක්වීමේ විශේෂ ඒකකය ගොනුකළ පැමිණිල්ල කැඳවූ අවස්ථාවේදී මෙම නොතීසිය ඉංග්රීසි භාෂාවෙන් නිකුත් කළේය.
පැමිණිල්ල කැඳවූ අවස්ථාවේදී ක්රීඩක සචිත්ර සේනානායක අධිකරණයේ පෙනී සිටියේය. ක්රීඩා දූෂණ වැළැක්වීමේ විශේෂ පොලිස් ඒකකය වෙනුවෙන් ස්ථානාධිපති ප්රධාන පොලිස් පරීක්ෂක සුපුල් විධානගේ මහතා කරුණු දක්වමින් කියා සිටියේ සැකකරුවන් විසින් එක ක්රීඩකයෙකුට ලක්ෂ 130 බැගින් ලබා දීමට පොළඹවා ගැනීමට උත්සාහ කිරීම සම්බන්ධයෙන් මෙම පැමිණිල්ල ගොනු කොට ඇති බවය.
තරිදු රත්නායක, ධම්මික ප්රසාත් ක්රීඩකයින් දෙදෙනාට මෙසේ මුදල් ලබාදීමට යෝජනා කරඇති බවත්.
2019 අංක 24 දරණ ක්රීඩා පනත අනුව මෙය සම්පූර්ණ නීති විරෝධී ක්රියාවක් බවත් සඳහන් කළේය .
සිද්ධිය සම්බන්ධයෙන් එක් විමර්ශනයක් අවසන් කර සචිත්ර සේනානායක සැකකරුට එරෙහිව කොළඹ මහාධිකරණයේ අධි චෝදනා ගොනු කොට ඇතිබවත්,ඉදිරි විමර්ශනය තවදුරටත් සිදු කරන බැවින් දෙවැනි සැකකරුට පොලිසියේ පෙනී සිට ප්රකාශයක් ලබා දෙන ලෙසට නියෝග කරන ලෙසත් ඉල්ලා සිටියේය.
පළමු සැකකරුට එරෙහි අධි චෝදනා නඩුව ලබන 27 දින කොළඹ මහාධිකරණය හමුවේ කැඳවීමට නියමිත බව ද පැවසීය.
