කරුවලගස්වැව ජයරත්න වික්රමාරච්චි
නිවසේ සිට උදෑසන සැමියා සමග සිය සේවා ස්ථානයට රැකියාවට ගිය තරුණ කාන්තාවක සවස වැඩ ඇරී හෙල්මටයක් පැලඳ පාපැදියකින් ආපසු නිවසට පැමිණි පුවතක් වයඹ පළාතේ උතුරු දිසාවට අයත් ප්රදේශයකින් පසුගිය දිනක අසන්නට ලැබුණි.
අමතකවීමකින් සිදුවූ බව කියන මෙම සිද්ධිය හේතුවෙන් අපහසුතාවට පත්වූ බව කියන එම කාන්තාව දින දෙකක්ම සිය සේවා ස්ථානයට නොගොස් නිවාඩු පිට නිවසටම වී සිටීමට වගබලාගෙන ඇති බවත් මෙහිදී අනාවරණය විය.
අදාළ සිද්ධියට මුහුණ දුන් කාන්තාව සිය නිවසේ සිට කිලෝ මීටර් දෙකක් පමණ දුරකින් පිහිටි පෞද්ගලික ආයතනයක සේවය කරන්නියක වන බවත් ඇගේ සැමියාද ඇගේ සේවා ස්ථානය පසුකර තවත් කිලෝ මීටර් පහක පමණ දුරක් ගිය විට පිහිටි පෞද්ගලික ආයතනයක සේවය කරන අයකු බවත් කියයි.
ඒ අනුව මෙම අඹුසැමි යුවළ දෙදෙනාගේ රැකියා ස්ථානවලට යාම සහ ආපසු නිවෙසට පැමිණීමේ ප්රවාහන කටයුත්ත විශේෂ හේතුවකට හැර වසර කිහිපයක සිටම එකම යතුරු පැදියකින් සිදුකර ගන්නා අතර එය දෙදෙනාටම පහසුවක් මෙන්ම සතුටටද හේතුවක් වී තිබේ.
මෙහිදී යතුරු පැදිය පදවන සැමියා උදෑසන බිරියද එහි නංවාගෙන ගොස් ඇගේ සේවා ස්ථානය අසලින් බස්සවා ඔහු ඔහුගේ සේවා ස්ථානයට යන අතර සවස වැඩ ඇරී ආපසු එන ගමන් බිරියද රැගෙන නිවසට එයි. කාලයක සිට සිදුවන මෙම ක්රියාවලිය විවිධ හේතුමත කලාතුරකින් සිදු නොවන අවස්ථාද ඇති අතර එවිට දෙදෙනා ඒ සඳහා විකල්ප ක්රමවේදයන් භාවිත කිරීමටද පුරුදුව සිටිති.
මෙදිනද අදාළ කාන්තාවට සිය සේවා ස්ථානයේ සිට නිවසට යාමට විකල්ප ක්රමවේදයක් භාවිත කිරීමට සිදුවී ඇතැයි පැවසෙන්නේ තම සේවා ස්ථානයේ අමතර වැඩක් යෙදී ඇති බැවින් තමන් ආපසු පැමිණෙන විට තරමක් ප්රමාද විය හැකි බවට ඇගේ සැමියා ඇයට දුන් හදිසි දුරකතන ඇමතුමක් නිසා බවද කියයි.
මෙවැනි අවස්ථාවලදී බොහෝ විට ඇය කරනුයේ උදේ යතුරු පැදියෙන් පැලැඳ ආ හෙල්මටයත් රැගෙන සේවා ස්ථානය ඉදිරිපිට මාර්ගයට වී සිටින අතර එවිට තම ගමනාන්තය දෙසට යන දන්නා කියන අයකු පැමිණියහොත් ඒ අයකු සමග තම ප්රවාහන අවශ්යතාව සපුරා ගන්නා අතර, නොඑසේ නම් ඇය තම සේවා ආයතනයේ ඇති භාවිතයට ගන්නා පාපැදිය රැගෙන නිවසට ගොස් පසුදින එම පාපැදියෙන්ම වැඩට එන අවස්ථාද ඇති බවත් කියයි.
මෙදිනද වැඩ ඇරී නිවසට යාම සඳහා ආයතනයේ පාපැදිය භාවිතකර ඇති ඇය තමන් උදේ සැමියා සමග යතුරුපැදියෙන් එද්දි පැලඳ ආ හිස්වැසුම වෙනදා මෙන් පාපැදියේ ඉදිරිපස කූඩයේ බහාගෙන යනවා වෙනුවට ආයතනයෙන් පිටතට විත් එය තම හිස පැලඳගෙනම පාපැදියට නැගී නිවසට පැමිණ ඇති බවද කියයි.
මෙහිදී හෙල්මටයක් පැලඳ පාපැදියකින් මහ මග යන කාන්තාව දුටුවන් අතර ඇය හඳුනන්නෝද නොහඳුනන්නෝද බොහෝ සිට ඇති බවත් ඒ අතර ඇගේ සැමියාද සිට ඇති බවත් කියයි.
ඔහු සිය ආයතනයෙන් තමන්ට පැවැරූ අමතර රාජකාරිය කඩිනමින් අවසන්කර කඩිනමින්ම බිරියගේ සේවා ස්ථානයට පැමිණ ඇති බවත් එහිදී බිරිය පාපැදියෙන් නිවසට ගොස් ඇති බව දැනගත් ඔහුද බිරිය ගිය මග දිගේ ඉදිරියට යතුරුපැදිය ධාවනයකර ඇති බවත් කියයි.
එහිදී හෙල්මටයක් පැලඳගෙන තමන්ට ඉදිරියෙන් පාපැදියෙන් යන බිරිය හඳුනා ගෙන ඇති සැමියා ඒ බවක් බිරියට නොහඟවා ඇය නිවසට යනතුරුම ඔහුද ඇය පසුපසින් තනියම සිනාසිසී සෙමින් යතුරු පැදිය ධාවනය කර ඇති බවත් කියයි.
