සුජිත් හේවාජුලිගේ
පිරිපුන් සංවිධානය ජාතික පරිවර්තනයක් අරමුණු කරගනිමින් බිම් මට්ටමින් නව ව්‍යවසායකයන් බිහි කිරීමේ අලු‍ත්ම වැඩපිළිවෙළක් ආරම්භ කර ඇත.
බිම් මට්ටමේ කාන්තා ව්‍යවසායකයන් සවිබල ගැන්වීම මෙහි පළමු අදියර බව පිරිපුන් සංවිධානයේ සභාපති ඉංජිනේරු ආනන්ද දේවසිංහ මහතා කොළඹදී පැවති ප්‍රවෘත්ති සාකච්ඡාවකදී පැවසීය.
මේ අනුව පිරිපුන් සංවිධානය රට පුරා තෝරාගත් ගෘහණියන්ට කුඩා ව්‍යාපාර ස්ථාන (පෙට්ටි-කඩ) 1,000ක් පළමු වටය යටතේ ලබාදීමට කටයුතු කෙරේ. එමගින් ඔවුන්ට තමන්ගේම ක්ෂුද්‍ර මට්ටමේ ව්‍යාපාර ආරම්භ කිරීමට ඉඩ ප්‍රස්ථාව සැලසෙන බව දේවසිංහ මහතා ප්‍රකාශ කළේය.
කාන්තාවන්ට ව්‍යාපාර සඳහා සූදානම් වීම සඳහා ආකල්පමය පුහුණුවක්ද මෙමගින් ලැබෙනු ඇති බවත් ඉන් අනතුරුව එම පිරිස් ශක්තිමත් ව්‍යවසායකයන් බවට පත් කිරීම සඳහා ව්‍යුහගත වැඩසටහන්වලට සම්බන්ධ කර ගැනෙන බවත් හෙතෙම කීවේය.
පිරිපුන් සංවිධානය පිහිටවනු ලැබ ඇත්තේ පවතින පාලනය පිළිගන්නා ගමන් ඉන් ඔබ්බට යන යහපාලනයක් ඇති කිරීම මූලික අරමුණු කර ගනිමිනැයිද ආනන්ද දේවසිංහ මහතා වැඩි පැවසීය.
