මෑතකදී නිකුත් කළ මහ බැංකු වාර්තාවට අනුව 2025 වසරේ ඛණිජ තෙල් සංස්ථාව සිය විගණන වාර්ථාවෙන් රුපියල් බිලියන 36.4ක ලාබයක් පෙන්වා ඇත්තේ බෙදුම්කරුවන්ගෙන් 2025දී අනීතික ලෙස කපා ගත් වට්ටම් මුදලත් සමග බව ඛණිජ තෙල් බෙදුම්කරුවන්ගේ සංගමය පවසයි.

1961 දී තෙල් සංස්ථාව ආරම්භයේ සිටම පාරිභෝගිකයන්ට ඉන්දන අලෙවි කරන ප්‍රධාන කොටස්කරුවන් (Stakeholders) වන බෙදුම්කරුවන්ට හිමි විය යුතු ලාභාංශ කොටසක් පැවති අතර 2025 මාර්තු 01 සිට සංස්ථාව අත්තනෝමතික ලෙස එම ලාභාංශ කොටසින් හරි අඩකටත් වැඩි ප්‍රමාණයක්  අත්පත් කර ගෙන ඇති බව සංගමය පවසයි. මෙම තත්වය නිසා සංස්ථා බෙදුම්කරුවන්ට ව්‍යාපාර පවත්වා ගෙන යාම ඉතා අසීරු වී ඇති අතර ඛණිජ තෙල් සංස්ථාවේම පමණක් අලෙවි නියෝජිත ධුර දරන සමුපාකාර පිරවුම්හල් 200කට ආසන්න සංඛාවක් සමග ග්‍රාමීය ප්‍රදේශවල පිරවුම්හල් රැසක් වැසී යාමේ අවදානමකට ලක් වී ඇති බව බෙදුම්කරුවන්ගේ සංගමය ජනපතිගේ අවධානයට යොමු කර ඇත.

විදේශීය තෙල් සමාගම් මෙරට වෙළෙඳපොළට පැමිණීමේදී ඔවුන්ගේ ව්‍යාපාර ස්ථාවර කිරීමේ අරමුණෙන් නව මිල සුත්‍රයක් 2022 නොවැම්බර් 29 දිනැති අංක 22/1876/604/076 දරන කැබිනට් පත්‍රිකාව (කැබිනට් පත්‍රිකාවේ පිටු අංක 7 සහ 8) මගින් අනුමත කර ඇත. ඒ අනුව තෙල් සමාගම්වලට සියයට 4ක (V6) ලාභාංශ ප්‍රතිශතයක්ද,  සියයට 2ක (V5) මෙහෙයුම් ප්‍රතිශතයක් සමග බෙදුම්කරුවන්ට මෙහෙයුම් ලාභාංශ ලෙස සියයට 2.96ක (V 2h) ප්‍රතිශතයක්ද (ආසන්න වශයෙන් සියයට 3ක්) නව මිල සුත්‍රය අනුව දෙන ලදී. 

මෙම කැබිනට් පත්‍රිකාව අනුව සංස්ථාවේ අධ්‍යක්ෂ මණ්ඩලය 16/08/2023 දිනැති අංක 27/1281 දරන අධ්‍යක්ෂ මණ්ඩල පත්‍රිකාවෙන් (පිටු අංක 9) බෙදුම්කරුවන්ට දෙන සියයට 3ක මෙහෙයුම් ලාභාංශ ප්‍රතිශතය ස්ථිර කර ඇත. ඒ අනුව විදේශීය සමාගම් ඔවුන්ගේ අලෙවි නියෝජිතයන්ට සියයට 3ක ලාභාංශ ප්‍රතිශතයක් දෙන බව එම සමාගම් විසින් දෙපාර්ශ්වය සමග අත්සන්  තබන ලද වෙළෙඳ ගිවිසුමේ ඇතුළත් වේ. විදේශීය සමාගම්  ගිවිසුම් ප්‍රකාරව ඔවුන්ගේ අලෙවි නියෝජිතයන්ට උපරිම සිල්ලර මිලෙන් (MRP) සියයට 3ක් දෙන අතර සංස්ථාවේ නව පාලන අධිකාරිය විසින් ඒක පාර්ශ්විකව මිල සුත්‍රයේ ඇති බෙදුම්කරුවන්ගේ මෙහෙයුම් ලාභාංශ ප්‍රතිශතය (V 2h) 2025/03/01 සිට සියයට 1.5 දක්වා අඩු කරන ලදී. සංස්ථාව පමණක් මෙලෙස මිල සුත්‍රයෙන් අලෙවි නියෝජිතයන්ට දී ඇති මෙහෙයුම් ලාභාංශ ප්‍රතිශතය අඩු කර එම කොටසද සංස්ථා ලාභයට එකතු කර ගෙන ඇත. 2024 විගණන වාර්තා අනුව ආසන්න වශයෙන් සංස්ථාව ලබා ඇති ලාභය බිලියන 34.2ක් වූ බැවින් 2025 වසරේ බෙදුම්කරුවන්ගෙන් කපා ගත් බිලියන ගණන සමග ලාභය බිලියන 36.4ක් නම් මෙම ලාබය විශාල ලාබයක් ලෙස පෙන්වන්නේ කෙසේද යන්න සංස්ථා බලධාරින්ගෙන් සංගමය ප්‍රශ්න කරයි.