(විමුක්ති එස් රුද්‍රිගු)

වේදනාකාරී ආර්ථික අර්බුදයකට පසුව බලාපොරොත්තු වූවාට වඩා වැඩි වේගයකින් ශ්‍රී ලංකා ආර්ථිකය ස්ථාවරත්වය කරා ගමන් කර ඇතත් තවමත් මෙරට ආර්ථිකයට ඇති අවදානම පහව ගොස් නැතැයි ලෝක බැංකුවේ මෙරට කළමනාකරු ගෙවෝර්ග් සර්ගේසියන් මහතා ඊයේ (10) ලෝක බැංකුවේදී පැවැති මාධ්‍ය හමුවකදී ප්‍රකාශ කළේය.

එම අවදානමෙන් ගොඩ ආ හැක්කේ කැපවීමෙන් ක්‍රියා කිරීමෙන් පමණක් බවත් නව රජය ප්‍රතිපත්ති අඛණ්ඩව ක්‍රියාත්මක කළහොත් එම අවදානමෙන් ගොඩ එමේ හැකියාව ශ්‍රී ලංකාවට තිබෙන බවත් ඔහු පැවැසුවේය.

දළ වශයෙන් රැකියා 142,500 ක් උත්පාදනය කළහැකි වාර්ෂිකව ඩොලර් බිලියන 10 ක් ලෙස ඇස්තමේන්තු කර ඇති අපනයන හැකියාවක් ශ්‍රී ලංකාව සතු බවද සර්ගේසියන් මහතා ප්‍රකාශ කළේය.නමුත් ඒ සඳහා ශ්‍රී ලංකාව අතගසා නොමැති බවත් එම අදායම මෙරටට ලබා ගැනීමට නම් ගතයුතු ක්‍රියාමාර්ග කීපයක් තිබෙන බවත් ඔහු සඳහන් කළේය.

එම ක්‍රියාමාර්ග පහසු ඒවා නොවන බවද ඔහු පෙන්වා දුන්නේය.

ලෝක බැංකුවේ අර්ධ වාර්ෂික ශ්‍රී ලංකා සංවර්ධන ඇගයුම නිකුත් කිරීම සඳහා සහ ඊයේ(10) ලෝක බැංකුවේදී මෙම මාධ්‍ය හමුව පැවැත්වූ අතර එහිදී ගෙවෝර්ග් සර්ගේසියන් මහතා මෙම අදහස් පළ කළේය.

එහිදී අදහස් දක්වමින් ආර්ථික විද්‍යාඥ ශෘතී ලක්ටකියා ප්‍රකාශ කර සිටියේ 2024 දී ආර්ථික වර්ධනය සියයට 4.4 දක්වා ළඟාවනු ඇතැයි අපේක්ෂා කරන බවත් එය පෙර පුරෝකථනයන් අභිබවා යාමක් බවත්ය. කර්මාන්ත සහ සංචාරක අංච මගින් දැක්වූ දායකත්වය මුල් කරගත් කාර්තු හතරක් පුරා සිදුව ඇති ආර්ථිකයේ අඛණ්ඩ වර්ධනය මෙන්ම, තීරණාත්මක ව්‍යුහාත්මක සහ ප්‍රතිපත්තිමය ප්‍රතිසංස්කරණ මත මෙම ධනාත්මක ඉදිරි දැක්ම ගොඩ නැගී ඇති බවද ඇය පැවැසුවාය.

එහිදී අදහස් දක්මින් ලෝක බැංකුවේ දකුණු ආසියානු කලාපයේ ප්‍රධාන ආර්ථික විද්‍යාඥ ෆ්‍රැන්සිස්කා ඔන්සොර්ජ් මහත්මිය ප්‍රකාශ කර සිටියේ දකුණු ආසියාවේ ශ්‍රම බළකායට කාන්තාවන්ගේ සහභාගීත්වය ප්‍රතිශතයක් ලෙස සියයට 32 ක් බවත් පිරිමින්ගේ ශ්‍රම බළකා සහභාගීත්වය ප්‍රතිශතයක් ලෙස සියයට 77 ක් බවත්ය. කාන්තාවන් ශ්‍රම බළකායට දක්වන සහභාගීත්වය සියයට 77ක මට්ටමකට ගෙන ආ හැකි නම් කලාපයේ දළ දේශීය නිෂ්පාදිතය සැලකිය යුතු මට්ටමින් ඉහළ දමාගත හැකි බවත් මේ වනවිට ඉන්දියාවේ ආර්ථිකය ශක්තිමත්වීමත් සමග වේගවත්ව වර්ධනය වන කලාපය බවට දකුණු ආසියාව පත්ව තිබෙන බවත් ඇය ප්‍රකාශ කළාය.