(සිතුම් චතුරංග සහ රොමේෂ් මධුසංඛ)

පාර්ලිමේන්තු මන්ත්‍රීවරයකු සිදුකරන විෂමාචාර සිද්ධින් මුහුණු පොත ඔස්සේ හෙළි කළැයි උරණවූ එම මන්ත්‍රීවරයකුගේ ආධාරකරුවන් පිරිසකට පහරකෑමට ලක් වූ තරුණයකු  වවුනියාව රෝහලට ඇතුළත් කළ බව ඕමන්ත පොලිසිය පවසයි.

ඊලාම් ජනතා ප්‍රජාතන්ත්‍රවාදී පක්ෂය නියෝජනය කරන අදාල මන්ත්‍රීවරයාගේ  ආධාර කරුවන් පිරිසක් තමන් පැහැරගෙන ගොස් පහරදුන් බවට පහරකෑ පුද්ගලයා පොලිසිය වෙත ප්‍රකාශකොට තිබේ.

පහරකෑ පුද්ගලයා සතුව තිබූ ස්මාට් වර්ගයේ ජංගම දුරකථනයක් හා මුදලින් රුපියල් 11000ක් පමණ සැකකරුවන් පැහැරගෙන ගොස් ඇති බවද පොලිසිය පැවසීය.

එලෙස පැහැරගෙන ගොස් පහරදී ඇත්තේ පාසල පාර , පූන්තෝට්ටම් ,වවුනියාව ලිපිනයේ පදිංචි 39 හැවිරිදි පුද්ගලයකුට වන අතර ඔහු තවදුරටත්  වවුනියාව මහ රෝහලේ ප්‍රතිකාර ලබන බවද පොලිසිය සඳහන් කළේය.

අටදෙනකුගෙන් පමණ සමන්විත පිරිසක්  පහර කෑ පුද්ගලයාගේ නිවසට  පැමිණ මහරම්භකුලම ප්‍රදේශයට පැහැරගෙන ගොස් වෙල්යායක් අසල නිරුවත් කොට පහරදී  මන්ත්‍රීවරයාට අපහාස කිරීම නවතා දමන ලෙස  තර්ජනය කළ බව ද පැහැර කෑ පුද්ගලයා පොලිසිය කළ පැමිණිල්ලේ සඳහන් වෙයි.

සැකකරුවන් මහරම්භකුලම පොලිස් ස්ථානය ආසන්නයට රැගෙනවිත් දමාගොස් ඇති බවත් කීය.

පහරදීමට පැමිණි පුද්ගලයන් හයදෙනකු හදුනාගෙන ඇති අතර ඔවුන් අත්අඩංගුවට ගැනීම සඳහා විමර්ශන සිදුකරන බවත් පහරදීම සම්බන්ධයෙන් සිද්ධියට මූලිකවූ මන්ත්‍රීවරයාගේ මැදිහත්වීමක් තිබේද යන්න විමර්ශන සිදුකරන බවත් පැවසීය.

(ඡායාරූප: රොමේෂ් මධුසංඛ)