(නිමල කොඩිතුවක්කු)
 
එක්සත් ජාතික පක්ෂයේ ඉදිරි ජනාධිපතිවරණ අපේක්ෂකයා පක්ෂ නායක අග‍්‍රාමාත්‍ය රනිල් වික‍්‍රමසිංහ මහතා බව සංචාරක සංවර්ධන, වනජීවී හා ක‍්‍රිස්තියානි කටයුතු අමාත්‍ය  ජෝන් අමරතුංග මහතා කොළඹදී පැවැසීය.

වෙනත් පක්ෂ වලින් අපේක්ෂකයන් වැඩි වන තරමට එක්සත් ජාතික පක්ෂයට වාසිදායක බවත් සඳහන් කළ අමරතුංග මහතා කිසිදු අභියෝගකින් තොරව ජනාධිපතිවරණය ජය ගැනීමේ අවස්ථාව තම පක්ෂය සතු බවද සඳහන් කළේය.

ශ්‍රී ලංකා සංචාරක සහ හෝටල් කළමනාකරණ ආයතනයේ අද (14) පැවැති උත්සවයකින් පසුව මාධ්‍යවේදීන් හමුවේ ප‍්‍රකාශයක් සිදුකරමින් ඔහු මේ බව පැවසීය.

එහිදි වැඩිදුරටත් අදහස් දැක්වූ අමාත්‍ය  ජෝන් අමරතුංග මහතා මෙසේ ද කීවේය.

 ‘‘නව ව්‍යවස්ථාව සම්බන්ධයෙන් විවිධ  අදහස් මතු වෙනවා.  කොයි විදියේ කෙටුම්පතක් ද  ඉදිරිපත් වී යුත්තේ කියලා දේශපාලන පක්ෂ අධ්‍යයනය කරලා යෝජනා කරලා තමයි තීරණය කරන්නේ.

පොලිස් බලතල ඉඩම් බලතල ගැන කථා වෙනවා. ඒ මොනවා කියලා තිබුණත් සියලූම දේශපාලන පක්ෂවල එකඟත්වයකින් තමයි තීරණය වන්නේ මොන විදියේ ව්‍යවස්ථාවක්ද ඉදිරිපත් විය යුත්තේ කියලා.

ඒ සඳහා එක්සත් ජාතික පක්ෂයේ යෝජනාත් ඉදිරියේදී ඉදිරිපත්  කිරීමට නියමිතය. කෘත්‍යාධිකාරී මන්ඩළය මේ ගැන තීරණයක් ගැනීමට නියමිතයි. අනිකුත්  දේශපාලන පක්ෂ සිය අදහස් ලබාදෙන අතරවාරයේදි මේ යෝජනාවල් අධ්‍යයනය කිරීමට අපේ පක්ෂයත් කණ්ඩායමක් පත් කරනවා. එහි නිර්දේශ අනුව  අනුව අපි කටයුතු කරනවා.

ඡායාරූප - චතුර එස් කොඩිකාර