(විමුක්ති එස් රුද්‍රිගු)

මෙම වසරේ පළමු මාස 6 තුළ ඇමෙරිකානු ඩොලර් මිලියන 507 ක සෘජු විදෙස් ආයෝජන ප්‍රමාණයක් මෙරටට ලැබී ඇති බවත් එය පසුගිය වසරේ පළමු මාස 6 ට සාපේක්ෂව සියයට 101 වර්ධනයක් බවත් ශ්‍රී ලංකා ආයෝජන මණ්ඩලයේ නවතම දත්ත වාර්තා පෙන්වා දෙයි.

පසුගිය වසරේ පළමු මාස 6 තුළ මෙරටට ලැබී තිබුණේ ඇමෙරිකානු ඩොලර් මිලියන 252 ක සෘජු විදෙස් ආයෝජන ප්‍රමාණයකි.

මෙම වසරේ පළමු මාස 6 තුළ මෙරට සෘජු විදෙස් ආයෝජනවල සිදුව ඇති සැළකිය යුතු වර්ධනය මෙරට ආයෝජන පරිසරය සහ ශ්‍රී ලංකාව ක්‍රියාත්මක කරන සෘජු විදෙස් ආයෝජනවල ප්‍රගතිය පිළිබඳව ආයෝජකයන් තුළ ගොඩනැගී ඇති විශ්වාසය පිළිබිඹු කරන බවද ශ්‍රී ලංකා ආයෝජන මණ්ඩලය පෙන්වා දුන්නේය.

මෙම වසරේ පළමු මාස 6 තුළදී ශ්‍රී ලංකා ආයෝජන මණ්ඩලය නව ව්‍යාපෘති 57 ක් සඳහා අනුමැතිය ලබාදී ඇති අතර එම ව්‍යාපෘතිවලින් ශ්‍රී ලංකාවට ලැබෙතැයි ඇස්තමේන්තු කර ඇති මුළු ආයෝජන වටිනාකම ඇමෙරිකානු ඩොලර් මිලියන 569 කි. ඉන් ඇමෙරිකානු ඩොලර් මිලියන 320 විදේශ ආයෝජන වේ.

අනුමැතිය ලබාදී ඇති ව්‍යාපෘති 57 න් 31 සෘජු විදෙස් ආයෝජනයන් මගින් ආරම්භ කරන නව ව්‍යාපාර වන අතර ඉතිරි ව්‍යාපෘති 26 දැනටමත් මෙරට සිටින සමාගම සිය මෙහෙයුම් කටයුතු පුළුල් කිරීම සඳහා ආරම්භ කරන ව්‍යාපෘති වේ.

ව්‍යාපෘති 57 මෙහෙයුම් කටයුතු ආරම්භ කිරීමෙන් පසුව රැකියා 14,000 එමගින් උත්පාදනය වනු ඇතැයි බලාපොරොත්තු වන අතර එමගින් රැකියා ක්ෂේත්‍රයට මෙන්ම මෙරට ආර්ථික වර්ධනයටද තල්ලුවක් ලැබෙනු ඇතැයි විශ්වාස කෙරේ.