(සුජිත් හේවාජුලිගේ)

මුදල් අමාත්‍යවරයාගේ අනුමැතියකින් තොරව  ශ්‍රී ලංකා රේගුවේ නිලධාරීන් සහ ඔත්තු කරුවන් සඳහා රුපියල් කෝටි 3726 ක මුදලක් 2012 සිට 2025 දක්වා වසර දාහතරක කාලයේදී ත්‍යාග මුදල් වශයෙන් ගෙවා ඇතැයි ජාතික විගණන කාර්යාලය නිකුත් කළ අලුත්ම වාර්තාවක සඳහන්වේ.

එසේම ශ්‍රී ලංකා රේගුවේ විමර්ශන කාර්යන්ට සෘජුව දායකත්වය නොසැපයන අංශ 18ක නිලධාරීන්ටද ත්‍යාග මුදල් වශයෙන් කෝටි 65 කට ආසන්න මුදලක් බෙදා හැර තිබූ බව  එම වාර්තාවේ දැක්වේ.

ත්‍යාග අරමුදලින් ත්‍යාග  මුදල් බෙදාහැරීම මුදල් අමාත්‍යවරයා අනුමත කළ යෝජනා ක්‍රමයකට අනුව කළ යුතු වුවත් එසේ එකඟතාවය  නොගෙන 2012 වසරේ සිට 2025 වසර දක්වා වසර දාහතරක කාලය තුළ ත්‍යාග මුදල් වශයෙන් නිලධාරීන්ට රුපියල් කෝටි 3184කට වැඩි මුදලක්ද කරුවන් සඳහා රුපියල් කෝටි 542කට වැඩි මුදලක්ද මෙසේ  බෙදා හැර තිබූ බව එම වාර්තාව සඳහන් කරයි

මේ අතර රාජ්‍ය ආයතන වල සියලු නිලධාරීන් ඇඟිලි සලකුණු යන්ත්‍ර  අනිවාර්යයෙන්ම භාවිත කළ යුතු බවට රජයේ ගිණුම් පිළිබඳ පාර්ලිමේන්තු කාරක සභාව නිර්දේශ කර තිබියදී එසේ කටයුතු නොකර  අතිකාල වියදම් ලෙස රුපියල් කෝටි 143කට  ආසන්න මුදලක් ගෙවා තිබූ බව විගණන නිලධාරිහු පවසති.

මීට අමතරව  නැව් බඩු පරීක්ෂා කිරීමේ ගාස්තු ලෙස රුපියල් කෝටි දහයකට ආසන්න මුදලක් ද තොරතුරු තාක්ෂණ හා සන්නිවේදන ගාස්තු ලෙස රුපියල් කෝටි එක්කෝටි විසි නව ලක්ෂයකට වැඩි මුදලක්ද පැමිණීම සහ පිටවීම විධිමත් ලෙස තහවුරු කර ගැනීමකින් තොරව නිලධාරීන්ට ගෙවා තිබූ බව එහි සඳහන්වේ.

භාණ්ඩ ආනයන හා අපනයන ක්‍රියාවලියට සම්බන්ධ පාර්ශවයන් 2022 සිට 2024 වර්ෂය දක්වා කාලයේදී අවස්ථා සීයකදී  රුපියල් කෝටි 256 කට වැඩි බදු මුදලක් ගෙවීම පැහැර හැර තිබූ බව පවසන විගණන වාර්තාව රේගුව මේ සම්බන්ධයෙන් විමර්ශනය කර රුපියල් කෝටි 300කට ආසන්න දඩ මුදලක් අයකරගෙන තිබුණද රජයේ ඒකාබද්ධ අරමුදලට රුපියල් කෝටි 90කට ආසන්න මුදලක් පමණක් බැර  කිරීමෙන් රුපියල් කෝටි 166කට වැඩි බදු ආදායමක් රජයට අහිමිව තිබූ බව පෙන්වා දෙයි.

මේ සම්බන්ධයෙන් අප රේගු ප්‍රධානියකුගෙන් කළ විමසුමකදී ඔහු පැවසුවේ රේගුවේ  අක්‍රමිකතා අවම  කිරීමට නව පරිපාලනය යටතේ  ක්‍රියාමාර්ග  ගනිමින් සිටින බවයි.

මේ තොරතුරු සඳහන් වන්නේ ශ්‍රී ලංකා රේගුවේ  2025 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.