(ගයාන් සූරිය ආරච්චි)

බොරැල්ල, සර්පන්ටයින් පාර ප්‍රදේශයේදී වෙළඳසැලක සිටි පුද්ගලයෙකුට යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් වෙඩි තබා පලායාම සිද්ධිය සම්බන්ධයෙන් ආධාර අනුබල දුන් සැකකරුවන් දෙදෙනෙකු ඊයේ (16) අත්අඩංගුවට ගත් බව බොරැල්ල පොලිසිය පවසයි.

අත්අඩංගුවට ගත් සැකකරුවන් වයස අවුරුදු 30 - 36 ක් වන ඉඹුල්ගස්දෙණිය සහ බොරැල්ල ප්‍රදේශයේ පදිංචිකරුවෝ වෙති.

 සැකකරුවන් අපරාධයට යොදා ගත් ත්‍රී රෝද රථයක් ද පොලිස් අත්අඩංගුවට ගෙන ඇත.

අත්අඩංගුවට ගත් එක් සැකකරුවෙකු සන්තකයේ තිබී අයිස් මත්ද්‍රව්‍ය ග්‍රෑම් 11 මිලිග්‍රෑම් 115 සමඟ අත්අඩංගුවට ගෙන ඇත.

ඔහු පදිංචි නිවස පරීක්ෂා කිරීමේදී මෙම අපරාධයට යොදා ගත් බවට අනාවරණය වූ ව්‍යාජ ලෙස සකසන ලද අංක තහඩුවක්, කඩුවක්, අපරාධකරුවන් ප්‍රවාහනය සඳහා යොදා ගත් ත්‍රී රෝද රථයක්  හා ජංගම දුරකථනයක් විමර්ශන නිලධාරින් භාරයට ගෙන ඇත.

බොරැල්ල පොලිසිය වැඩිදුර විමර්ශන සිදු කරනු ලබයි.