(අංජුල මහික වීරරත්න)

විනිසුරු විශ්‍රාම වයස වැඩි කිරීමට ආණ්ඩුව ගෙන තිබෙන තීරණය සම්බන්ධයෙන් දැනුවත් කිරීම සඳහා ජනතාවාදී ඒකාබද්ධ විපක්ෂයේ නායකයෝ අද (12) පෙරවරුවේ ශ්‍රී ලංකාවේ  බ්‍රිතාන්‍ය මහකොමසාරිස් ඇන්ඩෘ පැට්ට්‍රික්  මහතා කොළඹදී හමුවී සාකච්ඡා කළහ.

බ්‍රිතාන්‍ය මහ කොමසාරිස්වරයා හමුවීමෙන් අනතුරුව මාධ්‍ය හමුවේ අදහස් දැක්වූ ජනතාවාදී ඒකාබද්ධ විපක්ෂයේ කැඳවුම්කරු මහාචාර්ය ජී.එල් පීරිස් මහතා පැවසූයේ ඕනෑම ප්‍රජාතන්ත්‍රවාදී රටක නීතියක්, පනතක් ගෙනෙන විට විශාල සංවාදයක් ඇතිවිය යුතු නමුත් ලංකාවේ එවැනි දෙයක් සිදුවී නැති බවයි.

නීතිඥ සංගමය, විශ්වවිද්‍යාල, සිවිල් සංවිධාන කියන සියල්ලක්ම මේ සංවාදය සඳහා එකතු කර ගෙන ඔවුන්ගේ මතමතවාදයන් ගැඹුරින් සැලකිල්ලට භාජනය කිරීමෙන් පසුව  අවසාන තීරණය ගත යුතු බවද ජී.එල් පීරිස් මහතා මෙහිදී සඳහන් කළේය.

මේ අවස්ථාවට පාර්ලිමේන්තු මන්ත්‍රී නීතිඥ දයාසිරි ජයසේකර, හිටපු අමාත්‍ය ඩිලාන් පෙරේරා, සත්‍ය ගවේෂකයෝ සංවිධානයේ නිර්මාතෘ නීතීඥ ප්‍රේම්නාත් සී. දොලවත්ත, නව ජනතා පෙරමුණේ නියෝජ්‍ය නායක උපතිස්ස කුමාරතුංග යන මහත්වරු ද සහභාගී වූහ.