මතකයේ රැඳෙන ටෙලිනාට්‍යය චරිත කිහිපයක් හරහා බොහෝ පිරිසකගේ ආදරය දිනාගත් දිළිණි ලක්මාලි නව පරපුරේ ජනප්‍රිය රංගන ශිල්පිනියකි. මේ දිනවලද ටෙලිනාට්‍යය කිහිපයක් සඳහා සිය දායකත්වය සපයා ඇති දිළිණි, තරමක් කාර්යබහුල වී සිටියි. ඒ පිළිබඳව "සාරවිට" අපිට ඇය පැවසුවේ මෙවැන්නකි.

"මේ දවස්වල ටෙලිනාට්‍යය තුනක රූපගත කිරීම් කටයුතුවලට සම්බන්ධ වෙලා තියෙනවා. මේ දවස්වල 'පහන් කළුවර' කියලා අලුත් ටෙලියක වැඩ කරනවා. දැනට මේ ටෙලිනාට්‍ය "පහන් කළුවර" කියලා තමයි නම් කරලා තියෙන්නෙ. නමුත්, මෙහි නම බොහෝදුරට ඉදිරියේදී වෙනස් වේවි කියලා හිතනවා.

ඊට අමතරව සුරංගන් විජේනාමගේ අලුත් ටෙලියකත්, ධම්මික තිසේරාගේ අලුත් ටෙලියකත් වැඩ කරනවා. මේ නිර්මාණ හරහා මගේ රසිකයන්ට ඉදිරියේදී මාව දැකගන්න ලැබෙවි.

මේ ටෙලි නාට්‍යය තුනක් එක්ක මම ගොඩක් ටෙලිනාට්‍යයවල රඟපාලා තියෙනවා. නමුත්, ටෙලි නිර්මාණවලට ලැබෙන තරම් ආරාධනා සිනමා නිර්මාණ සඳහා ලැබෙන්නේ නැහැ. සිනමාවට සම්බන්ධ වෙන්න කියලා ආරාධනා කිහිපයක් ලැබුණා නමුත්. ඒ චරිත මට ගැළපෙන්නේ නැහැ. ඒත්, හොඳ සිනමා චරිතයක් ලැබුණොත් මම අනිවාර්යයෙන්ම සිනමාවට දායක වෙනවා. මොකද, ටෙලි නාට්‍යයවලටත් වඩා මම ගොඩක් කැමති සිනමා නිර්මාණවලට දායක වෙන්න."