විදුලිබල මණ්ඩලය සඳහා  පෞද්ගලික බලාගාරවලින් විදුලිය මිලදීගැනීම සහ විදුලි බලාගාර වෙනුවෙන් ඉන්ධන ගෙන්වීමේදී සිදුවී ඇති බව කියන මහ පරිමාණ මුදල් වංචා සම්බන්ධයෙන් මූලික විමර්ශන කටයුතු සඳහා කරුණු දැක්වීමට විදුලිබල අමාත්‍යාංශ ලේකම් ආචාර්ය සුරේන් බටගොඩ මහතාට  අද (02) සිදුවිය. 

වත්මන් ආණ්ඩුවේ රාජ්‍ය ආයතන වල සිදුව ඇතැයි පැවසෙන දූෂණ හා වංචා සම්බන්ධයෙන් සොයා බැලීමට පත් කළ ජනාධිපති පරීක්ෂණ කොමිෂන් සභාවට  ලැබී ඇති පැමිණිල්ලේ විමර්ශන කටයුතු වෙනුවෙන්  ආචාර්ය සුරේන් බටගොඩ මහතා කොමිසම හමුවට කැඳවන ලදි. බටගොඩ මහතා පැය හතරකට ආසන්න කාලයක් එම කොමිෂන් සභාවේ පොලිස් ඒකකය වෙත ප‍්‍රකාශයක් දී තිබේ. 

විදුලිබල මණ්ඩලයේ පසුගිය කාලය තුළදී සිදුව ඇතැයි කියන මෙම දූෂණ සහ වංචා සම්බන්ධයෙන් සොයා බැලීමට ජනාධිපති කමිටුවක් පත් කරන්නැයි අමාත්‍ය පාඨලී චම්පික රණවක මහතා කැබිනට් පත‍්‍රිකාවක් මඟින් ඉල්ලා තිබිණ.  ජනාධිපති මෛත‍්‍රීපාල සිරිසේන මහතාගේ නිර්දේශය මත ඒ සම්බන්ධයෙන් විමර්ශන පැවැත්වීම දූෂණ සහ වංචා සොයා බැලීමේ ජනාධිපති කොමිෂන් සභාවට පැවරිණි.

2015 ජනවාරි 15 දින සිට 2018.දෙසැම්බර් 31 දින දක්වා කාලය තුළ රජයේ ආයතන වල සිදුවී ඇතැයි සැලකෙන දූෂණ සහ වංචා සම්බන්ධයෙන් දූෂණ සහ වංචා සොයා බැලීමේ ජනාධිපති කොමිෂන් සභාව කරුණු සොයා බලයි.

ඒ යටතේ විදුලිබල මණ්ඩලය සම්බන්ධ පැමිණිල්ලේ මූලික විමර්ශන සඳහා අවශ්‍ය විස්තර සහ තොරතුරු ලබා දීමට විදුලිබල අමාත්‍යාංශ ලේකම්වරයා අද (2) පෙරවරු 9.00 සිට පැය 4 කාලයක් කොමිෂන් සභාවේ පොලිස් ඒකකයට තොරතුරු සැපයූ බවද එම කොමිෂන් සභාවේ උසස් නිලධාරියෙක් ලංකාදීපයට පැවසීය.

වත්මන් ආණුඩවේ රාජ්‍ය ආයතන වල සිදුව ඇතැයි පැවසේන  දූෂණ සහ වංචා සම්බන්ධයෙන් සොයා බැලීමට පත් කළ ජනාධිපති පරීක්ෂණ කොමිෂන් සභාවට  හිටපු අමාත්‍ය සහ පාර්ලිමේන්තු මන්ත‍්‍රී විජයදාස රාජපක්ෂ මහතා ද පැමිණිළි කර තිබේ. 

මහපොළ උසස් අධ්‍යාපන ශිෂ්‍යත්ව බාර අරමුදලේ රුපියල් මිලියන 23000 ක් මුදලක් එහි නිලධාරීන් විසින් වංචනික ලෙස අවභාවිත කර ඇතැයි පාර්ලිමේන්තු මන්ත‍්‍රී විජයදාස රාජපක්ෂ මහතා කියයි. 

මෙම පැමිණිල්ල සම්බන්ධයෙන් ප‍්‍රකාශයක් දීම සඳහා විජයදාස රාජපක්ෂ මහතා අනිද්දා (04) කොමිෂන් සභාවට පැමිණීමට නියමිතව  ඇත.