දැනට පවතින ආණ්ඩුව ආණ්ඩුක‍්‍රම ව්‍යවස්ථාවට අනුකූළ වන ජාතික ආණ්ඩුවක් නොවන බවට ප‍්‍රකාශ කරන ලෙසත් , පත් කර සිටින ඇමැතිවරු , රාජ්‍ය ඇමැතිවරුන් , සහ නියෝජ්‍ය ඇමැතිවරු පත්වීම බලරහිත කරන ලෙස  ඉල්ලා ගොනු කර තිබූ මූලික අයිතිවාසිකම් පෙත්සම සංශෝධිත පෙත්සමක් ලෙස ඉදරිපත් කිරීමට ශ්‍රේෂ්ඨාධිකරණය අද (16) අවසර ලබා දුන්නේය.

හිටපු පාර්ලිමේන්තු මන්ත‍්‍රී රියර් අද්මිරාල් සරත් වීරසේකර මහතා සහ කැළණිය විශ්ව විද්‍යාලයේ රාගම වෛද්‍ය පීඨයේ මහාචාර්ය විමලධර්ම අභයවික‍්‍රම මහතා විසින් ගොනු කර ඇති මෙම පෙත්සම ඉදරිපත් කරන අවස්ථාව වන විට පැවති කැබිනට් මණ්ඩලය මේ වන විට වෙනස් වී ඇති බැවින් අලූතින් කැබිනට් මණ්ඩලයට එක්වූ සාමාජිකයින්ගේ නම් ඇතුළත් කිරීමට අවසර දෙන ලෙස පෙත්සම්කරුවන්ගේ නීතීඥවරු කළ ඉල්ලීමකට අනුව අධිකරණය මෙම අවසරය දෙන ලදී.

පෙත්සම අගවිනිසුරු කේ.ශ්‍රී පවන් සහ විනිසුරු උපාලි අබේරත්න යන මහත්වරුන්ගෙන් යුතු ශ්‍රේෂ්ඨාධිකරණ විනිසුරු මඩුල්ලක් හමුවේ කැඳවිණි.

අධිකරණය හමුවේ පෙත්සම කැඳවූ අවස්ථාවේදී සංශෝධිත පෙත්සමක් ඉදිරිපත් කර ඇති බව පෙත්සම්කාර නීතීඥවරුන් දන්වා සිටි අතර විනිසුරු මඩුල්ල සඳහන් කර සිටියේ එම සංශෝධිත පෙත්සම මුල් නඩු ගොනුවට ඇතුළත්ව නොමැති බවය.

පෙත්සම ජුනි මස 03 වැනිදාට පෙර ගොනු කරන ලෙස නියම කරන ලදී.