ලෝකය යහපත් තැනක් කළ හැක්කේ, සාමය පවතින්නේ නම් පමණක් බවත්, යුද ගැටුම්වලින් එය කළ නොහැකි බවත්, ඉන්දීය අග්‍රාමාත්‍ය නරේන්ද්‍ර මෝදි පෙන්වා දෙයි.

කෙසේ නමුත්, ලෝක සාමයට ත්‍රස්තවාදය බාධාවක් බවත්, ත්‍රස්තවාදයට සැවොම එරෙහි විය යුතු බවත්, ඉන්දීය අග්‍රාමාත්‍යවරයා වැඩි දුරටත් පැහැදිලි කර ඇත.

ඉන්දීය අග්‍රාමාත්‍යවරයා මේ බව පැහැදිලි කළේ ඇමෙරිකාවේ එක්සත් ජාතීන්ගේ මූලස්ථානයේ පැවැති ‘එක්සත් ජාතීන්ගේ අනාගත සමුළුවට’ සහභාගී වී එම සමුළුව අමතමිනි. 

එක්සත් ජාතීන්ගේ මහ ලේකම් ඇන්තෝනියෝ ගුටරේස්ගේ ප්‍රධානත්වයෙන්, ප්‍රධාන පෙළේ ලෝක නායකයන් රැසකගේ සහභාගීත්වයෙන්, ‘එක්සත් ජාතීන්ගේ අනාගත සමුළුව’ පැවැත්වෙන්නේ අනාගත ලෝකය යහපත් තැනක් කිරීමේ අරමුණින්ය. 

මෙම අනාගත සමුළුව, එක්සත් ජාතීන්ගේ මහ ලේකම් ඇන්තෝනියෝ ගුටරේස්ගේ සංකල්පයකට අනුව ආරම්භ වූවකි. මෙම නව සමුළුව පැවැත්වෙන්නේ එලැඹෙන 2025 වසරේ දී එක්සත් ජාතීන්ගේ සංවිධානය පිහිටුවා වසර 80 ක් පිරීමට සමගාමීවය.

සමුළුවට ඉන්දීය අග්‍රාමාත්‍ය මෝදි, යුක්රේන ජනාධිපති ව්ලොදිමීර් සෙලෙන්ස්කී පමණක් නොව, ඉරානයේ නව ජනාධිපති මසූඩ් පෙසෙෂ්කින, රුසියාව වෙනුවෙන් එරට නියෝජ්‍ය විදේශ අමාත්‍ය සර්ගේ වර්ෂිනින් පවා සහභාගී වූහ.

යුද ගැටුම්, දේශගුණ විපර්යාස, දරිද්‍රතාව, අසමානතාව සහ අනාගත ලෝකයට බලපෑම් ඇති කරන ‘ඒ.අයි.’ හෙවත් කෘත්‍රිම ඥානය ගැන එක්සත් ජාතීන්ගේ අනාගත සමුළුවේ දී ලෝක නායකයන්ගේ අවධානය යොමු විය.

(එන්.ඩී.ටීවී.)