මානව හිමිකම් කඩවීම සම්බන්ධයෙන් ඉදිරිපත් කළ යෝජනාව ක්‍රියාවට නැංවීමේදී ශ්‍රී ලංකාකියන් සියලු දෙනාම පරිපූර්ණව හා අර්ථාන්විතව ඊට සම්බන්ධ විය යුතු බව එක්සත් ජාතීන්ගේ මානව හිමිකම් කොමසාරිස් සෙයිද් රාද් හුසේන් මහතා   පැවැසීය.

ශ්‍රී ලංකාව සම්බන්ධයෙන් පසුගිය වසරේදී එක්සත් ජාතීන්ගේ මානව හිමිකම් කවුන්සිලයට ඉදිරිපත් වූ යෝජනාව ක්‍රියාවට නැංවීමේ ආණ්ඩුවේ කැපවීම පෙන්නුම් කිරීමට නම් පුළුල් උපායමාර්ගික සැලැස්මක් අවශ්‍ය බව ද ඔහු අවධාරණය කළේය.

එක්සත් ජාතීන්ගේ මානව හිමිකම් කවුන්සිලයේ 32 වැනි සැසිවාරය අමතමින් ඔහු මේ බව කීවේය. 

ගෝලීය මානව හිමිකම් සම්බන්ධයෙන් කරුණු දක්වමින් ශ්‍රී ලංකාව පමණක් නොව ඇමෙරිකා එක්සත් ජනපදය ඇතුළු ලොව රටවල මානව හිමිකම් සම්බන්ධයෙන්  ද ඔහු අදහස් දැක්වීය. 

යෝජනා 30/1 ක්‍රියාත්මක කිරීමේදී වඩාත් ප්‍රායෝගික හා උපායමාර්ගක සැලැස්මක අවශ්‍යතාව පෙන්වා දුන් මහ කොමසාරිස්වරයා සියලු පාර්ශව සම්බන්ධ කරගනිමින් ශ්‍රී ලංකා රජය කටයුතු කළ බව ද පෙන්වා දුන්නේය. 

මානව හිමිකම්වලට ගරුකම් සෑම රටකටම වඩාත් තිරසර හා නිහතමානී මාර්ගයක ගමන් කිරීමට අවස්ථාව උදා කර දෙන බව ද මානව හිමිකම් ආරක්ෂා කිරීමට සියලු දෙනා ඇප කැප වී කටයුතු කළ යුතු බව ද තවමත් එයට ප්‍රමාද නැතැයි ද ඔහු වැඩිදුරටත් පෙන්වා දුන්නේය.  

ජීනිවාහිදීය (ඒ.එෆ්.පී)