පසුගිය දිනවල බොහෝ දෙනාගේ අවධානය දිනාගත් ටෙලිනාට්‍යය කිහිපයකම රඟපෑ දසුන් නිශාන් ජනප්‍රිය යොවුන් නළුවෙකි. මේ දිනවල විකාශය වන ටෙලිනාට්‍යය කිහිපයකම ඔබ දකින ඔහු ඉදිරියේදී තවත් බොහෝ ටෙලි නිර්මාණ හරහා දකින්නට ප්‍රේක්ෂක ඔබට අවස්ථාව ලැබේ. ඒ අතරින් ආසිරි රණසිංහ විසින් අධ්‍යක්ෂණය කරන 'මන්දාරම් අහස' ටෙලිනාට්‍යය දසුන්ට විශේෂ එකක් වී ඇත. ඒ දසුන්ට මෙහි 'අහස්' නම් ප්‍රධාන චරිතයට පණ පොවන අතර, ඔහු සමගින් නව පරපුර අතර වඩාත් ජනප්‍රිය සුරූපී නිළියන් තිදෙනෙකු ඔහුගේ පෙම්වතියන් ලෙස චරිත නිරූපණය කිරීමත් විශේෂිත සිදුවීමකි.

'මේ ටෙලි නාට්‍යය යොවුන් වියෙහි පසුවන පාසල් යන තරුණ, තරුණියන් වටා ගේතුණු කතාවක්. මම තමයි මෙහි 'අහස්' කියන ප්‍රධාන චරිතයට පණ පොවන්නේ. මට ආදරය කරන ගෑණු ළමයි තුන් දෙනෙක් ඉන්නවා. එක්කෙනක් තමයි 'අමන්දා'. 'අමන්දා' කියන්නේ ධනංජි තාරුකාට. 'මන්දාරා' කියන්නේ බුද්ධි ජයවර්ධන. ශෂි ඇන්ජලිනා 'මන්දාරම් අහස' නාට්‍යයේ 'නෙතු' කියන චරිතය රඟපානවා. කතාවේ හැටියට මේ තරුණියන් තිදෙනාම මට ආදරය කරනවා. තාම මේ ටෙලිනාට්‍යයේ රූපගත කිරීම් සිදුවෙමින් පවතිනවා. ඒ නිසා 'මන්දාරම් අහස' කෙදිනක විකාශය වෙනවාද කියලා තාම කියන්න බැහැ. නමුත්, මට හිතෙනවා මේ නාට්‍යය බොහෝ පිරිසකගේ අවධානය දැනටමත් දිනාගෙන තියෙනවා කියලා.'