(තුසිත කුමාර ද සිල්වා)

අලුත්ගම දර්ගා නගරයේ  ගෑස් පෝලීම්  වල රැදී සිටි පිරිස ,පොලීසිය සහ ගෑස් අලෙවි නියෝතයා සමඟ  අද (21) උණුසුම් තත්ත්වයක් ඇති විය.

නගරයේ  පොලිස් මුරපොල, ප්‍රාදේශීය සභා උපකාර්යාල  සහ තැපැල් කාර්යාලය  ආසන්නයේ  වටරවුමක්  ආකාරයෙන් දිගුගෑස්  පෝලිමේ සිටි ජනතාවගෙන් පුද්ගලයන්  තුන්සියයකට පමණ ගෑස් නොමැති බව පැවසීමත් සමඟ  මෙම තත්වය  ඇති ව තිබේ.

අලුයම  සිට  රැකියා වලින් නිවාඩු දමා පෝලිමේ සිට හිස් අතින්  ආපසු නිවෙස්  වෙත යාමට සිදු වූ  එම ජනතාව  පවසා සිටියේ   පෝලිමේ සිටින පුද්ගලයන්ට කිසියම් ටෝකන් පතක්   ගෑස් තිබෙන ප්‍රමාණයට ලබා දෙන්නේ නම්  තමන් මෙයාකාරයෙන් දින ගණන් රස්තියාදු නොවන බවයි .

පාන්දර හතරේ සිට  ගෑස් ලොරිය පැමිණෙන  තෙක්   පෝලිමේ සිටියත්  ගෑස්   ලබාදීමට හැකි වී ඇත්තේ   පුද්ගලයන් 250කට පමණ බව   එම  ස්ථානයේ සිටි පොලිස් නිලධාරීන් කීහ .

බොහෝ ප්‍රදේශවලින් පැමිණි පිරිස්  කූඨ උපක්‍රම යොදා  මුදලට පෝලිමේ පුද්ගලයන්ව තබා ගෑස්  ටැංකි හය හත  මිලදී ගන්නා ආකාරයත්  දැකගත හැකි විය .

ගැබිනි මව්වක්ද   සිය බිළිඳු දරුවා සමග  පෝලිමේ සිට ටැංකියක් මිලදී ගත් බව  කීහ .