සංරක්ෂණය සහ  බලශක්ති කාර්යක්ෂමතාවය සඳහා මේ දිනවල ක්‍රිියාත්මක වන ටාර්ෂීඞ් ජාතික වැඩසටහන උපරිම සාර්ථිකත්වයට ළඟා වෙමින් රටේ ඒකපුද්ගල විදුලි සහ ජල පරිභෝජනය පිළිවෙළින් සියයට 14 කින් සහ 17 කින් පහළ බැස තිබේ. 2015 වසරේදී මෙම වැඩසටහන දියත් කිරීමෙන් පසුව කටාර් රියාල් මිලියන 800 ක් ඉතිරි කරගැනීමට හැකිවී ඇති අතර ඊට අමතරව ඉන් කාබන්ඩයොක්සයිඞ් විමෝචනය මෙන්ම ගෑස් පරිභෝජනයද අඩුවී ඇත.
එමීර් ෂෙයික් ටාමිම් බින් හමාඞ් අල් තානි මහතාගේ අනුග්‍රහය ඇතිව කටාර් පොදු විදුලි සහ ජල සංස්ථාව (කරාමා) තාර්ෂීඞ් වැඩසටහනේ සිවුවැනි සැමරුම පසුගිය ඉරිදා ෂෙරටන් දෝහා හෝටලයේදී පැවැත්වීය. “හෙට දිනය අද ආරම්භවෙයි” යන තේමාව යටතේ පැවැති මෙම උත්සවය අමාල් සහ දෝහා කේබල්ස් ආයතනවල සහයෝගය ඇතිව සංවිධානය කර තිබුණි.

මෙම උත්සවය සඳහා අග්‍රාමාත්‍ය සහ අභ්‍යන්තර අමාත්‍ය ෂෙයික් අබ්දුල්ලා බින් නාසර් බින් කාලීෆා අල් තානි, බලශක්ති සහ කර්මාන්ත අමාත්‍ය ආචාර්ය මොහොමඞ් බින් සලේහ් අල් සාදා, කරාමා සභාපති ඉංජිනේරු එසා බින් හිලාල් අල් කුවාරි සහ තවත් සම්භාවනීය අමුත්තන් රැසක්ම සහභාගි විය.

එහිදී කරාමා ආයතනය සිය අනාගත උපායමාර්ග, ව්‍යාපෘති සහ මේ දිනවල ක්‍රියාත්මක වන වැඩසටහනෙන් ඉටු කරගන්නා ලද ඉලක්ක සම්බන්ධයෙන්ද අනාවරණය කළේය. ඉහත වැඩසටහනෙන් ඉටු කරගැනීමට බලාපොරොත්තු වූ ප්‍රධානම ඉලක්කය වූයේ ජල සහ විදුලි පරිභෝජනය සීමා කර කටාර් හි වැදගත් සම්පත් සංරක්ෂණය කිරීමේ සංස්කෘතියක් ඇති කරලීමයි.

මීට අමතරව, සිය බහුවිධ උපායමාර්ග ඔස්සේ සමාජයේ සියලුම අංශයන්ට ළඟා වෙමින් ඉතා වටිනා සම්පත් සංරක්ෂණය කිරීම සම්බන්ධයෙන් දැනුම්වත් භාවයක් ආරම්භ කිරීමටද කරාමා ආයතනය බලාපොරොත්තු වෙයි.

කරාමා ආයතනයේ සංරක්ෂණ සහ බලශක්ති කාර්යක්ෂම දෙපාර්තමේන්තුව විසින් සංවිධානය කළ විවිධ තරගවලින් ජයලැබූ පුද්ගලයන් ඇගයීමක්ද එහිදී සිදුකෙරුණි.