කොළඹ නගරයේ බොහෝ ස්ථාන ජලයෙන් යටවීම හේතුවෙන් අවතැන්වූ පිරිස් සොයා ආධාර ලබාදීමේ කටයුතු මේ වන විට ක්‍රියාත්මක වෙමින් පවතී.

මේ හේතුවෙන් වැල්ලම්පිටිය, කොටිකාවත්ත, පෑලියගොඩ, බේස්ලයින් පාර, අංගොඩ ආදී පෙදෙස්වල මාර්ග රැසකම ගමනාගමනය අවහිර වී ඇතැයි පොලිසිය පවසයි.

නාවික හමුදාව හා සිවිල් සංවිධාන බෝට්ටු යොදා ආධාර ජලයෙන් යටවූ ප්‍රදේශවල නිවාසවල කොටුවී සිටින ජනතාව වෙත ප්‍රවාහනය කිරීමට කටයුතු යොදා ඇත. බෙහෙත් ද්‍රව්‍ය, සනීපාරක්ෂක තුවා, ඉටිපහන්, ගිනිපෙට්ටි, පානීය ජලබෝතල්, ඇඳුම් පැළඳුම් හා ඖෂධ වර්ග ඔවුනට අවැසිව ඇතැයි එම පෙදෙස්වල වැසියෝ කියති.

මේ වන විට ක්‍රමයෙන් ජල මට්ටම අඩුවී යන බවද එම පෙදෙස්වල ජනතාව පවසති. ලැබෙන ආධාර ඇතැම් ස්ථානවලට ලැබුණද අතුරු මාර්ග හා ජලයෙන් යටවී ඇති ඇතැම් පෙදෙස්වලට නොලැබෙන බවද ගම්වැසියෝ කියති. සංචාරය සඳහා එම ස්ථාන නැරඹීමට හා විනෝදය පිණිස පැමිණීමෙන් වළකින්නැයි පොලිසිය හා ආරක්ෂක හමුදා ජනතාවගෙන් ඉල්ලා සිටිති. එසේ පැමිණීමෙන් ආධාර උපකාර කටයුතු කරන්නන්ටද බෝට්ටු මගින් ප්‍රවාහන කටයුතු සිදුකිරීමටද බාධා පැමිණෙන බව ඔවුහු කියති.

එසේ පැමිණෙන පිරිස් හේතුවෙන්ද මාර්ග තදබදයක් ඇතිවී ඇති බවද පොලිසිය පවසයි.