(බී. ජී. චතුරංග සහ උපුල් හේරත්)

මහනුවර - යාපනය, ඒ නවය මාර්ගයේ මිහින්තලය සහ තිරප්පනය යන ප්‍රදේශවල සිදුවූ රිය අනතුරු දෙකකින් යුද හමුදා මේජර්වරයකු ඇතුළු පුද්ගලයන් තිදෙනකු ජීවිතක්ෂයට පත්වූ බව මිහින්තලය සහ තිරප්පනය පොලිසි පවසයි.

ඒ නවය මාර්ගයේ කිලෝමීටර් කණු 128 සහ 129 අතර පිහිටි මිහින්තලේ, වැල්ලමොරාන ප්‍රදේශයේදී ගල්කුලම දෙස සිට මිහින්තලය දෙසට ධාවනය වූ කැබ් රථයක් මාර්ගයෙන් ඉවතට පැන දකුණු දිසාවට ධාවනය වී මාර්ග සංඥා පුවරුවක සහ බෝක්කුවක ගැටී  සිදුවූ රිය අනතුරකින් පුද්ගලයන් දෙදෙනකු ජීවිතක්ෂයට පත්වූ බව මිහින්තලේ පොලිසිය පවසයි.

මෙලෙස ජීවිතක් සිට පත්ව ඇත්තේ , නුග සෙවන නුවර පාර , පලුගස්වැව ලිපිනයේ පදිංචිව සිටි කැබ්රථ රියදුරා වන සෙනවිරත්නගේ කවිඳු උදාර සෙනවිරත්න නැමැති 25 හැවිරිදි පුද්ගලයකු සහ අනුරාධපුර රණසේවාපුර 21වන පාබල සේනාංකයේ රාජකාරී කරමින් සිටි යුද හමුදා මේජර්වරයකු වන මිහින්තලේ අනුරාධපුර පාර පදිංචිව සිටි නිෂ්ශංක ආරච්චිලාගේ දිනේෂ් ඉසුරු කුමාර නිෂ්ශංක නැමති 37 හැවිරිදි පුද්ගලයෙකි.

ඒ නවය මාර්ගයේ තිරප්පනය දෙස සිට ගල්කුලම දෙසට ධාවනය වූ වෑන් රථයක් එම මාර්ගයේ ඥානික්කුලම පාලම පසුකර කිලෝ මීටර්කණු 118 සහ 119 කණු දෙක අතර ප්‍රදේශයේදී, මාර්ගයෙන් ඉවතට පැන පෙරළී යාමෙන් පුද්ගලයකු ජීවිතක්ෂයට පත් වූ බව තිරප්පනේ පොලිසිය පවසයි.

මෙලෙස ජීවිතක්ෂයට පත්ව ඇත්තේ සිවලාකුලම, පුලියන්කුලම ප්‍රදේශයේ පදිංචිව සිටි එන්. කපුරුබණ්ඩා නැමති 93 හැවිරිදි පුද්ගලයෙකි.