• කරන්දෙණිය - එම්. සුසිල් ප්‍රියන්ත

නූපන් දෙවැනි දරුවා ගැන හඳුන්වා දෙමින් අමුතු විදියේ ගේමක් දී මුදලක් අතමිට මොළවා ගත් අපූරු ගුරුවරයකු පිළිබඳ පුවතක් දකුණේ ප්‍රධාන පාසලකින් අසන්නට ලැබේ.

මෙම ගුරුවරයා දකුණු පළාතේය. ඇඹේනිය මැද පළාතකය. දුරය. පෙළවහක් කර ගත්ත දා සිට ඔහු සිටියේ මැද පළාතේය.

පාසලේ ඉගැන්වීම් කරන සතියේ දින පහේ පමණක් සිටියේ දකුණු පළාතේය. නිවාඩු ලද සැණින් ඔහු නවතින්නේ මැද පළාතේය. සිය භාර්යාවට පුතකු හමුවුණා කර ගන්න කිසිම දෙයක් නෑ: ආර්ථිකේ නම් අන්තිම අමාරුයි කියමින් ඔහු තමන්ගේ හිතවත් ගුරුවරුන් කිහිප දෙනකුටම කියා නාහෙන් ඇඬුවේය.

එහි ප්‍රතිඵලයක් ලෙස පාසලේම ගුරුවරුන් ඔහුට නොදැනෙන්නට මුදලක් එකතු කළේ ඔහුට දෙන්නය. ගුරුවරුන් දෙතුන් සියයක් ඉන්නා මේ පාසලේ ඔහු වෙනුවෙන් එකතුවූ මුදල රුපියල් ලක්ෂයකට ආසන්න මිසක් ඊට අඩුවක් නොවීය. 

ඒ මුදල හිතවත් ගුරුවරුන් පිරිස ඔහු අත තිබ්බේ ලද සැණින් අලු‍ත උපන් දෙවැනි පුතා බලන්නට එන බව ද කියමිනි. 

අනේ ඒක කොච්චර හොඳ දෙයක් ද එන දවස මට කලින් කියන්න ඕනෑ යයි ඔහු කීවේ ගුරුවරුන් එකතු කර දුන් මුදල් කවරය දිහා හොරහින් බලමිනි.

අවස්ථා කිහිපයකදීම මොහුගේ දෙවැනි පුතා බැලීමට යාම සඳහා හිතවත් ගුරුවරුන් දින යොදා ගත්තද ඔහුගේ එක එක හේතු මත එක එක දිනට එය කල් ගියේය. ඒ සමගම ඔහුගේ දෙවැනි පුතා බැලීමට යාමේ ආශාව හා කැමැත්ත කාගෙ කාගෙනුත් දුරස්වී ගියේ ඇත්තටම එය අමතක වෙමිනි.

මේ අල්ල පනල්ලේ ඔහුගේ පළමු වැනි දුව පාසලට පැමිණියේ එහි පැවැති විශේෂ උත්සව අවස්ථාවකදීය. ගුරුවරු කිහිප දෙනෙක්ම මේ දරුවා හුරතල් කළහ. ඒ අතර කෑම බීම ජාතිද අරගෙන දුන්හ. 

ඔය අතර වාරයේදී ගුරුවරුන් කිහිප දෙනෙකුම ඇය වට කරගත්තේ දුව කොහෝමද දැන් ඔයාගේ මල්ලී ලොකු ඇති නේ අපිට එයා බලන්න එන්නත් බැරි වුණානේ යැයි කියමිනි. 

මේ ප්‍රකාශයත් සමගම අන්දමන්ද වූ දැරිය අනේ අංකල් මට කොයින් ද මල්ලි කෙනෙක්. මට මල්ලි කෙනෙක් නැනේයි ඇය සුරතල් බසින් අසන හැම ගුරු භවතාටම කීවාය.

ගුරුවරුන්ද එකම ප්‍රශ්නය කීප වතාවක්ම පුන පුනා ඇසුවේ ඔවුන් ද හරි හමන් විදියට අගමුල ලිහා ගන්නය. වැඩේ පත්තුවිය. පාසලේ හැම ගුරුවරයාගේම කනට නූපන් පුතුගේ කතන්දරේ යන්නට වැඩිවේලාවක් ගත නොවිණි.