(ජේ.කේ.එල් චාමින්ද සහ පියරත්න ජයවික්‍රම)
 
නෙළුව ප්‍රදේශයේ කොරෝනා ආසාදනය වු  අයගේ පවුල්වල  සාමාජිකයින් 13 දෙනෙකුටද කොරෝනා වයිරසය ආසාදනය වී ඇති බවට තහවුරුවී ඇති බැව් ගාල්ල දිස්ත්‍රික් ප්‍රාදේශීය වසංගත රෝග විද්‍යාඥ වෛද්‍ය වෙනුර කේ සිංගාරච්චි මහතා පවසයි.
 
මෙම පවුල්වල සාමාජිකයින් 100 දෙනෙකු සදහා රැපිඩ් ඇන්ටිජන් පරික්ෂණ සිදුකළ අතර ඒ අනුව මේ බව අනාවරණය වී ඇත. ආසාදනය වු අය අතර කුඩා දරුවකු ද සිටින  බවද ඒ මහතා පවසයි. පිරිමි 06  දෙනා අම්පාර රෝහල වෙත ද කාන්තාවන් හා දරුවන් 07 දෙනා කරන්දෙණිය දිස්ත්‍රික් රෝහල වෙත යොමුකළ බවද ප්‍රාදේශීය වසංගත රෝග විද්‍යාඥවරයා පවසයි.
 
නෙළුව සතිපොළ  අසල තේ කඩයක් පවත්වාගෙන ගිය කාන්තාවකට ඇතුළු 13 දෙනෙකුට මීට පෙර කොරෝනා ආසාදනය වී තිබුණි. මේ වනවිට නෙළුව  ප්‍රදේශයේ පුද්ගලයින් 26 දෙනෙකුට  කොරෝනා වයිරසය ආසාදනය වී ඇති බවට තහවුරුවි ඇති බවද ඒ මහතා පවසයි. නෙළුව සතිපොළේ වෙළදුන්ටද අහඹු පි.සි ආර් පරික්ෂණ කර ඇති බවද ප්‍රාදේශිය වසංගත රෝග විද්‍යාඥවරයා සදහන් කළේය.
 
තවලම  සතිපොළේ වෙළදුන් ඇතුළු පාරිභෝගිකයින් 27 දෙනෙකුට ද කොරෝනා ආසාදනය වි ඇති බවද හෙතෙම පවසයි.