බැංකු ගනුදෙනු සඳහා රහස් කේත සහ මුර පද වෙනුවට ඇඟිලි සළකුණු ඔස්සේ අනන්‍යතාව තහවුරු කර ගැනීමේ ක්‍රමවේදයක් නව තාක්ෂණය ද මුසු කර ගනිමින් හඳුන්වා දීමට ජපන් රජය සැරසේ.

සෑම වසරකම කෝටි හතර කට වැඩි සංචාරකයන් පිරිසක් ජපානයට පැමිණෙති. මොවුන් බියෙන් සැකයෙන් මුදල් ගනුදෙනු සිදු කරන බව හෙළි වී ඇති හෙයින් එය මඟ හරවා ගැනීමට සංචාරකයන් ඉලක්ක කර ගනිමින් මෙම නව ක්‍රමවේදය හඳුන්වා දුන් බවත් ජපානය පවසයි.

රට පුරා ව්‍යාප්තවන අයුරින් ආරම්භ කරන මෙම නව ක්‍රමවේදයට විදෙස් සංචාරකයන්ට බියක් සැකක් නොමැතිව, ඉතා ආරක්ෂිතව ඔවුන්ගේ ගිනුම්වලට ප්‍රවේශ විය හැකි බවත් ක්‍රෙඩිට් කාඩ් පරිහරණය කළ හැකි බවත් ජපන් රජය පැහැදිලි කරයි.

අද වනවිට බොහෝ දෙනකු ස්මාර්ට් ෆොන් දුරකතන භාවිතා කරමින් බැංකු ගනුදෙනු සිදු කරන බවත්, එහිදී ගිනුම්වලින් මුදල් ලබා ගැනීමට ඇඟිලි සලකු-ණු පරීක්ෂා කරන පරිගණක මෘදුකාංග සම්බන්ධ කර ඇති බවත් ජපන් රජය වැඩි දුරටත් කියා සිටී.

මේ සඳහා තමන් ජපන් ජංගම දුරකතන සමඟ ද සම්බන්ධ වී කටයුතු කරන බව ජපන් බලධාරීහු වැඩි දුරටත් කියා සිටිති.  මෙම නව ක්‍රමවේදය වසර 2020 දී ටෝකියෝ අගනුවර පැවැත්වෙන ඔලිප්මික් උලෙළ නිමිත්තෙන් ජපානයට පැමිණෙන විදෙස් සංචාරකයන්ට පහසුවක් වනු ඇතැයි ද පැවැසෙයි.