නැවුම් එළවළු, පළතුරු, මාළු සහ ධාන්‍ය සමඟ ඔලිව්තෙල් ආහාරයට ගැනීමෙන් හෘදයාබාධ, දියවැඩියාව ඇතුළු රෝග ගණනාවකින් වැළකී සිටිය හැකි බව අධ්‍යයනයකින් සොයාගෙන තිබේ.

ස්පාඤ්ඤ රොවිරා විශ්වවිද්‍යාලයේ පර්යේෂකයන් පිරිසක් විසින් හෘදයවස්තුවේ ආබාධවලින් පෙළීමේ අවධානම ඇති මිනිසුන් 5800 ක් යොදාගනිමින් මේ පර්යේෂණය සිදුකැර ඇත. මේ සඳහා වසර පහක කාලයක් ගතකළ බව ද පර්යේෂකයෝ කියති. මොවුන් කොටස් තුනකට බෙදා එක් කණ්ඩායමකට ඔලිව් ඔයිල් සහ නැවුම් පළතුරු, එළවළු හා කිරි වැඩිපුර අඩංගු ආහාර වේලක් ද අනෙක් කණ්ඩායමට ඇට වර්ග වැඩිපුර අඩංගු නැවුම් එළවළු පළතුරු කිරි සහිත ආහාර වේලක් ද අනෙක් කණ්ඩායමට අඩු මේදය සහිත ආහාර වේලක් ද ලබා දෙන ලදී.

පර්යේෂකයන් පෙන්වාදෙන්නේ නැවුම් එළවළු, පළතුරු හා කිරි අනුබව කළ කණ්ඩායම් දෙක ම තම ස්ථුලතාව අඩුකරගෙන තිබූ බවයි. එසේ ම අධ්‍යයන කාලයේ දී ඔවුන්ගේ රුධිරගත ග්ලූකෝස් ප්‍රමාණය ද අඩුවී තිබිණි.

ඔලිව් ඔයිල් ආහාරයට ගත් අයගේ ශරිරයේ මේද තැන්පත් වීමේ ප්‍රමාණය අඩුවී තිබූ අතර එය අඩු මේදය ආහාරයට ගත් අයට වඩා වැඩි ප්‍රමාණයකින් අඩුවීමක් බව ද පර්යේෂකයෝ කියති. ඒ අනුව පර්යේෂණ ප්‍රධානී වෛද්‍ය ජෝඩි සලාස් පෙන්වාදෙන්නේ ඔලිව්තෙල් ආාහරයට ගැනීමෙන් රෝගවලින් වැළකී සිටීමේ හැකියාව වැඩිවන බවයි.