ඉන්දියාවේ උත්තර් ප්‍රදේශ්වල පිහිටි සාතාපූර්හි දී හත් හැවිරිදි ගැහැණු දරුවකු ඥාතීන් විසින් පණ පිටින් වළලන්නට යාමේ දී එයට මැදිහත් වූ ගැමියෙක් ඇය බේරාගත්තේය.

පොලිසිය පවසන්නේ ඥාතීන් විසින් පළමුව ඇගේ ගෙළ සිරකර මරා දමන්නට තැත්කර ඇති බවයි. ඉන්පසු නොගැඹුරු මිනී වළක වළලන්නට උත්සාහ කැර ඇත. දැරිය විලාප තබමින් කෑ ගසනු අසා මේ ගැමියා ඒ ගැන විපරම් කරන විට නොගැඹුරු වළෙන් යන්තමින් හිස ඔසවාගත් දැරිය තමන් වසාදමා තිබූ පස් අතින් ඉවත්කරමින් සිටිනු ඔහු දැක ඇත. වළලන විට සිහි නොමැතිව සිටි දැරිය සිහිය ආවිට තමන්ට ඉහළින් තිබූ පස් ඉවත්කිරීමට උත්සාහ ගත් බව ඇය පොලිසියට කියා ඇත. ඇය බේරාගත් පුද්ගලයාට ඇසී ඇත්තේ ඒ අවස්ථාවේ දැරිය මහ හඬින් නැගූ විලාපයයයි. පොලීසිය පවසන්නේ ඇගේ ගෙල සිරකිරීමට උත්සාහගත් සළකුණු දක්නට ලැබෙන බවයි.

දැරිය මව සමග ජීවත් වූ අතර පියා වෙන්ව ගොසිනි. දැරියගේ මාමා සහ නැන්දා ඇය සල්පිලක් ඇති ස්ථානයකට ගෙන යන බවට පොරොන්දු වී මේ ස්ථානයට ගෙනගොස් ඇති බව ද පරීක්ෂණවලින් අනාවරණය වී ඇත. මේ සිද්ධියට සම්බන්ධ මව, මාමා සහ නැන්දා යන තිදෙනා අත්අඩංගුවට ගැනීමට සොයමින් සිටින බව පොලිසිය කියයි.

විදෙස් මාධ්‍ය වාර්තා කරන්නේ ඉන්දියාවේ මෙවැනි සිදුවීම් දුර්ලභ නොවන බවයි. සැමියා මියගිය විට ඔහුගේ දේහය දැවෙන සෑයට බිරිඳ පැන සියදිවි නසා ගන්නා සති පූජාව පැවැත්වෙන ඉන්දියාවේ කාන්තාවන්ට විවිධ කෙනෙහිළිකම් සිදුවෙයි. දුප්පත් පවුල්වල ගැහැනු දරුවන් මුදල් පරිහානියට හේතුවක් ලෙස විශ්වාසයක් ඉන්දියාවේ ඇත.