ප‍්‍රධානියාගේද ආශිර්වාදය ඇතිව කාර්යාලයේ සගයින් හා එකතුවී හොද හැටි ඇග පත රත් කරගැනීමට සේවකයින්ට අවස්ථාව සළසා දෙන අපූරු චාරිත‍්‍රයක් ජපානයේ ඇත.

‘‘නොමිකායි‘‘ ලෙස හැදින්වෙන මෙයින් කාර්යාලීය සගයින් අතර සබදතාවය වර්ධනය කිරීම අපේක්ෂා කෙරේ.එනිසාවෙන්ම මෙයට කාර්යාලයේ ඉහළ බළධාරීන්ගේද ආශිර්වාදය හිමිය.

මෙය සාමාන්‍යයෙන් අප දන්නා පරිදි කාර්යාලයක සේවකයින් වසරක් පාසා සංවිධානය කරන සාදයක හෝ විනෝද චාරිකාවක හෝ ස්වරූපයෙන් වෙනස්ය.සියලූ දේ සිදුකෙරෙන්නේ කාර්යාලයේදීය

‘‘නොමිකායි‘‘ දිනයේදී සේවකයින්ට පාරිතෝෂික දීමනාවක්ද ලබා දීමට ඇතැම් ආයතන ප‍්‍රධානීහු කටයුතු කරන්නෝය.ඒ ඔවුන් කෙසේහෝ එදිනට කාර්යාලයට ගෙන්වා ගැනීමේ අරමුණ ඇතිවය.තම සේවකයින්ට කන පාත් කර ගැනීමට අවස්ථාව සළසා දීමට කාර්යාල ප‍්‍රධානීන් කෙතරම් වෙහෙස වනවාදැයි මෙයින් සිතා ගත හැකිය.

ජපානයේ සංස්කෘතියට අනුව මත්පැන් පානයටද සැළකිය යුතු ස්ථානයක් හිමිය.පුද්ගලයින් අතර සම්බන්ධතාවයක් වර්ධනය කරන්නක් ලෙස ජපාන ජාතිකයෝ එය සළකති.

‘‘නොමිකායි‘‘ තමන්ට උසස්වීමක් ලබාගත හැකි ලෙහෙසිම විදිය ලෙස ඇතැම් ජපාන ජාතිකයින් දකී.කාර්යාලයේ සියලූ දෙනා එක්ව විනෝද වන බැවින් තම ශිල්ප පෙන්වීමට එය අවස්ථාවක් කර ගැනීමට ඔවුහු උත්සාහ කරන්නෝය.

හොද හැටි පදම්වී ‘‘හතරගාතයෙන්‘‘ නිවෙස් බලා යන මෙවන් කාර්යාල සේවක පිරිසකගේ ඡායාරූපයන් රැසක් පසුගියදා අන්තර්ජාලයට එක්ව තිබුණේය.