මිගෙල් ට්‍ර්විනෝ මොරාලෙස් නම්වූ මෙක්සිකෝවේ සිටි දරුණුතම කුඩු අපරාධ කරු පසුගිය සඳුදා එරට හමුදාව විසින් අත්අඩංගුවට ගනු ලැබීය.

සේටාස් නම්වූ අපරාධ කල්ලියේ නායකයා ඔහුය. ඔවුන්ගේ ප්‍රධානතම කාර්යය වුයේ ලොවපුරා මත්ද්‍රව්‍ය බෙදාහැරීමය. වයස අවුරුදු 40ක් වූ මොරාලෙස් හිත පිත් නැති කෘර අපරාධකරුවකුලෙස නම් දරා සිටියේය. අත්අඩංගුවට පත්වනවිට නවීන අවි ආයුධවලින්   සන්නද්ධව සිටි ඔහුගේ අතේ ඇමෙරිකා  ඩොලර් විසි ලක්ෂයක් (රුපියල් ලක්ෂ 2560) තිබුණ බවද වාර්තා විය.

මහා පරිමානයේ කුඩු ජාවාරමට අමතරව මොරාලෙස් නායකත්වය දුන් සෙටා අපරාධ කල්ලිය මං පැහැරීම්, කොල්ලකෑම්, පැහැරගෙනයෑම් සහ දස වධදී මිනිසුන් මරාදැමීම් පිළිබඳව ප්‍රසිද්ධියක් ඉසිලීය.

තමන්ගේ ක්‍රියාපටිපාටියට එරෙහිවන්නන් අමු අමුවේ මරාදැමීමත් මළසිරුරු එළිමහනේ ප්‍රදර්ශනය කිරීමත් ඔවුන් නිතර සිදුකළ දෙයකි. සෙටා අපරාධ කල්ලිය අතින් දහස් ගණනක් මියයන්නට ඇතැයි බොහෝදෙනා විශ්වාස කරති.

2009 දී ඇමෙරිකාවේ නිව්යෝක් අධිකරණය මඟින් මොරාලෙස් මිනීමැරීම්,කොල්ලකෑම් සහ මත්ද්‍රව්‍ය බෙදාහැරීම සඳහා වරදකරු ලෙස තීන්දුවක් දී ඇති අතර ඔහු අත්අඩංගුවට ගැනීමට ඔත්තුවක් සපයන්නෙකුට ඇමෙරිකා ඩොලර් ලක්ෂ 50ක් (රුපියල් ලක්ෂ 6400) තෑගී දෙන බවටද ප්‍රසිද්ධ කර ඇත. මෙම නඩුවේදී ට්‍රේවිනෝ මොරාලෙස් මෙක්සිකෝවේ සිට ගෝතමාලාව හරහා ඇමෙරිකාවට සතිපතා කොකේන් සහ ගංජා මත්ද්‍රව්‍ය විශාල ප්‍රමාණයක් හොරෙන් ගෙන ගිය බවටත් එමඟින් උපයාගත් මුදල් ආපසු මෙක්සිකෝවට ගෙන ගිය බවටත් ඔහු වරදකරු කරනු ලැබීය.