තලේබාන් සටන්කාමීන්ගේ මරණ තර්ජන නොතකා ඉම්රාන් ඛාන් සහ ඔහුගේ තරීක් ඊ ඉන්සාෆ් පක්ෂ සාමාජිකයෝ දහස් ගණනක් ඊයේ (7) පාකිස්තානයට අයත් දකුණු වසිරිස්තානයේ ගෝති‍්‍රක ප‍්‍රදේශයේ විරෝධතා රැලියක් පැවැත්වීමට සූදානමින් සිටියහ. තලේබාන් සහ අල් කයිඩා සටන්කාමීන්ගේ රජ දහන ලෙසත් ලෝකයේ වඩාත් බිහිසුණුම ස්ථානය ලෙසත් හැඳින්වෙන දකුණු වසිරිස්තානයේ ගෝති‍්‍රක ප‍්‍රදේශයට ගොස් ඉම්රාන් ඛාන් සහ ඔහුගේ පක්ෂ සාමාජිකයන් විරෝධතා රථ රැලියක් පැවැත්වීමට සූදානම් වූයේ ඇමෙරිකා හමුදාව නියමුවන් රහිත ඩ්‍රෝන යානා යොදා ගනිමින් සිදු කරන ප‍්‍රහාරවලිදී සිවිල් වැසියන් මිය යෑමට එරෙහිවය. බස්, ලොරි, වෑන් සහ යතුරු පැදිවලින් සමන්විත එම විරෝධතා රථ පෙළ ඊයේ උදෑසන වෙද්දී පාකිස්තාන ගෝති‍්‍රක ප‍්‍රදේශයට ඇතුළු වීමට සූදානමින් සිටියේය. ඩ්‍රෝන යානා යොදා ගනිමින් ඇමෙරිකාව එල්ල කරන එම මිසයිල ප‍්‍රහාර අල් කයිඩාවේත් තලේබාන් සටන්කාමීන්ගෙත් විරෝධයට හේතු වී ඇති නමුත් ඔවුහු ඉම්රාන් ඛාන් සහ තරීක් ඊ ඉන්සාෆ් පක්ෂයේ දේශපාලන දර්ශනය අනුමත නොකරති. ඉම්රාන් ඛාන් හෝ තරීක් ඊ ඉන්සාෆ් පක්ෂ සාමාජිකයන් හෝ තම අණසක පවතින ගෝති‍්‍රක ප‍්‍රදේශයට ඇතුළු වුවහොත් මරාගෙන මැරෙන බෝම්බකරුවන් එවා ඉම්රාන් ඛාන් ඝාතනය කරන බවට තලේබාන් සංවිධානය මීට පෙර අවස්ථා ගණනාවකදී තර්ජනය කර තිබුණි. පාකිස්තාන තලේබාන් නායක කාරී හසන් 2010 වසරේදී ඇමෙරිකානු ඩ්‍රෝන ප‍්‍රහාරයෙන් මියගිය කොට්කාර් නමැති ගම්මානයට යෑමට ඉම්රාන් ඛාන් සහ ඔහුගේ තරීක් ඊ ඉන්සාෆ් පක්ෂ සාමාජිකයෝ සූදානමින් සිටියහ. තරීක් ඊ ඉන්සාෆ් පක්ෂය, වර්තමාන පාකිස්තාන දේශපාලනයේ පෙරැළියක් ඇති කිරීමට සමත් ව සිටී. පාකිස්තාන කි‍්‍රකට් කී‍්‍රඩකයකු ලෙස කාගේත් ආදරයත් ගෞරවයත් දිනූ ඉම්රාන් ඛාන් මේ වනවිට පාකිස්තානයේ ප‍්‍රබල දේශපාලන චරිතයකි. පාකිස්තාන රජයත් ආරක්ෂක අංශත් තරීක් ඊ ඉන්සාෆ් පක්ෂයෙන් ඉල්ලා සිටියේ කොට්කාර් ගම්මානය බලා යෑමෙන් වැළැකී සිටින ලෙසටය. 2004 වසරේ සිට 2012 තෙක් කාලයේ ඇමෙරිකා හමුදා ඉස්ලාමීය සටන්කාමීන් ඉලක්ක කර ගනිමින් එල්ල කරන ඩ්‍රෝන යානා පහාරවලට සිවිල් වැසියෝ 3,325 දෙනෙක් බිලි වූහ. ඇමෙරිකා හමුදාව ඩ්‍රෝන යානා යොදා ගනිමින් පහර දෙන්නේ බුද්ධි අංශ නිලධාරීන්ගෙන් ලැබෙන තොරතුරු පාදක කර ගනිමිනි. බොහෝ අවස්ථාවලදී ඔවුන් එම ප‍්‍රහාර එල්ල කරන්නේ පාකිස්තාන රජය හෝ හමුදාව හෝ බුද්ධි අංශ හෝ දැනුම්වත් නොකරයි. ඉම්රාන් ඛාන් විරෝධතා රැලියට එක්වෙමින්....