(අනීෂා මානගේ)
 
හම්බන්තොට දිස්ත්‍රික්කයට බලපෑ වැසි සහිත කාලගුණ තත්වය හේතුවෙන් පවුල් 362ක පුද්ගලයන් 1240ක් අවතැන් වී ඇතැයිද, නිවාස 200කට පමණ අර්ධ හානි සිදුව ඇතැයිද ආපදා කළමනාකරණ මධ්‍යස්ථානය සහ දිස්ත්‍රික් ලේකම් බන්දුල හරිස්චන්ද්‍ර මහතා කියයි.

තංගල්ල, බෙලිඅත්ත, මාරකොල්ලිය, වීරකැටිය, කපුගම්පොත, රන්න, ඕකෙවෙල, සිටිනාමළුව, හම්බන්තොට ආදී ප්‍රදේශ රැසක නිවාස අද පෙරවරු කාලය වනවිටත් ජලයෙන් යටවී තිබිණි.

එම ප්‍රදේශවල ජලය බැස නොයාම හේතුවෙන් සාමෝදාගම විහාරස්ථානය, සීතාරාමය සහ වීරකැටිය කපුගම්පොත පුරාණ විහාරයේ පිහිටුවා ඇති අවතැන් කඳවුරු තුනක අවතැන් වූ පුද්ගලයන් රඳවා ඇතැයි ආපදා කළමනාකරණ මධ්‍යස්ථානය කියයි.

හම්බන්තොට දිස්ත්‍රික්කයේ කිසිදු ජීවිත හානියක් හා තුවාල වාර්තා වී නොමැත.

අවතැන් වූ පුද්ගලයන් බේරා ගැනීම සඳහා අවශ්‍ය වුවහොත් බෝට්ටු යෙදවීමටද සූදානම් කර ඇතැයි යුධ හමුදාවේ තංගල්ල කඳවුරේ නිලධාරීහු පැවසූහ.

අවතැන් වූ ජනතාවට පිසූ ආහාර ලබා දීම ආරම්භ  කර ඇතැයි දිස්ත්‍රික් ලේකම් කාර්යාලය කියයි. පොලිස් නිලධාරීන්, නාවික හමුදා නිලධාරීන්, යුධ හමුදා නිලධාරීන්, ආපදා කළමණාකරන මධ්‍යස්ථානයේ නිලධාරීන් අවතැන් වූ ජනතාව වෙනුවෙන් සහන සැලසීමට යොදවා ඇතැයිද දිස්ත්‍රික් ලේකම් කාර්යාලය කියයි.