(ටී.කේ.ජී.කපිල )

ශ්‍රී ලංකාවේ කොරෝනා මර්දන ක්‍රියාවලිය සදහා තෙවන මාත්‍රාව ලෙස ලබා දීමට , ශ්‍රී ලංකාවේ ඖෂධ නීතිගත සංස්ථාව විසින් ඇනවුම් කර මිළදී ගත් ඇමෙරිකාවේ "ෆයිසර්" එන්නත් 842,400 ක් අද (20) උදෑසන ඩුබායි සිට කටුනායක ගුවන් තොටුපළ වෙත ගෙනැවිත් තිබේ .

කිලෝ ග්රැම් 4,360 ක් බර මෙම එන්නත් තොගය පෙට්ටි 130 ක අසුරා , මුලින්ම  ඇමෙරිකාවේ සිට නෙදර්ලන්තයේ ඇම්ස්ටර්ඩෑම් වෙත ගුවන් මගින් ගෙනැවිත් , එතැන් සිට එක්සත් අරාබි එමීර් රාජ්‍යයේ ඩුබායි වෙත රැගෙන විත් තිබුණි .

ඉන්පසුව මෙම එන්නත් තොගය අද (20) උදෑසන 08.35 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපළ වෙත රැගෙන විත් තිබුණි .

මෙම එන්නත් සෙල්සියස් ඍණ 80 ක (-80C°) රදවා තබා ගත යුතු අතර, ශ්‍රී ලංකා ඖෂධ නීතිගත සංස්ථාවේ විශේෂ ශීතකරණ පහසුකම් සහිත ලොරි රථ මගින් ඔවුන්ගේ කොළඹ පිහිටි මධ්‍යම ගබඩා සංකීර්ණය වෙත රැගෙන යාමට පියවර ගෙන තිබුණි .