(ෂෙල්ටන් හෙට්ටිආරච්චි)

මැතිවරණ නීතිරීති උල්ලංඝණය කරමින් ආගරපතන නගරයට ආසන්න ස්ථානයක ජනාධිපතිවරණයට අදාළ ප්‍රචාරක පෝස්ටර් අලවමින් සිටි දෙදෙනකු ආගරපතන පොලිසිය විසින් අත්අඩංගුවට ගෙන නුවරඑළිය මහේස්ත්‍රාත් අධිකරණයට ඉදිරිපත් කිරීමෙන් පසු සැකකරුවන් වරද පිළිගැනීම හේතුව නිසා ඔවුන් ශරීරි ඇප මත මුදාහැර ඇත.

අද (04) වෑන් රථයකින් පැමිණ දික්ඔය හා බගවන්තලාවේ පදිංචිකරුවන් දෙදෙනකු ශ්‍රී ලංකා පොදුජන පෙරමුණේ අපේක්ෂකට සහාය පලකරමින් විශාල ප්‍රමාණයේ පෝස්ටර් අලවමින් සිටියදී ආගරපතන පොලිස් නිලධාරින් විසින් අත්අඩංගුවට ගෙන ඇත.

එම අවස්ථාවේදී වෑන් රථය තුළ පෝස්ටර් 19240 ක් පමණ තිබුණු බව පොලිසිය කියයි.

සැකකරුවන් දෙදෙනා ද පෝස්ටර් හා වැන් රථය අද (04) නුවරඑළිය මහේස්ත්‍රාත් ප්‍රමෝද ජයසේකර මහතා වෙත ඉදිරිපත් කිරීමෙන් පසු සැකකරුවන් වරද පිළිගැනීම නිසා ඔවුන් දෙදෙනා ශරීර ඇප දෙකක් මත මුදාහැර ඇත.