( බිමල් ශ්‍යාමන් ජයසිංහ)
මහරගම ඇරැව්වල පුරාණ විහාරස්ථානයක් ඉදිරිපිටදී තියුණු ආයුධවලින් කපා කොටා අමානුෂික අයුරින් තරුණයකු ඝාතනය කිරීමේ සිද්ධියට යොදා ගත් සුඛෝපභෝගී මෝටර් රථ දෙකක් සමඟ පාතාල සාමාජිකයෙකු හා තවත් පුද්ගලයෙකු අත් අඩංගුවට ගත් බව මිරිහාන විශේෂ අපරාධ මෙහෙයුම් ඒකකය පවසයි.
ඉකුත් 07 වැනි දින අලුයම සිදු කළ මෙම ඝාතනය සඳහා සම්බන්ධ අඹුසැමි යුවළක්, එකම පවුලේ සහෝදරයන් දෙදෙනෙකු ඇතුළු හය දෙනෙකු මීට දින තුනකට ඉහතදී ඇරැව්වලදී හා ඇඹිලිපිටියේදී අත් අඩංගුවට ගැනිනි.
එම සැකකරුවන් හා සැකකාරියගෙන් ප්‍රශ්න කිරීමේදී හෙළි වූ තොරතුරු අනුව පාතාල සාමාජිකයා නාරාහේන්පිටදී සහ අනෙක් පුද්ගලයා කඩුවෙලදී අත් අඩංගුවට ගත් බව පොලිස් නිලධාරියෙක් පැවසීය.
කඩවත පුද්ගලයා රැගෙන ආ මෝටර් රථයට අමතරව අංගොඩ ප්‍රදේශයේ කුලී රථ සේවා ආයතනයකින් මෝටර් රතයක් කුලී පදනම මත ලබාගෙන තරුණයා ඝාතනය කිරීම සඳහා සැකකරුවන් පිරිස ගමන් කර ඇති බව සිදු කළ විමර්ශන වලදී හෙළි වී ඇතැයි පොලිසිය පවසයි.
කොලොන්නාව සැලමුල්ල ආනන්ද රාජා පාරේ පදිංචිව සිටි විරාජ් පාලිගේ පුෂ්පකුමාර (22) නැමැත්තා ඝාතනය කිරීමෙන් පසු මොවුන් සියලු දෙනා තලවතුගොඩ ප්‍රදේශයට ගොස් නව රෝහල ආසන්නයේ ආපනශාලාවක් ඉදිරිපිට ඝාතනයට ලක් වූ තරුණයා පැදගෙන ආ යතුරුපැදිය දමාගොස් තිබියදී සොයා ගෙන තිබිණි.
අත් අඩංගුවට ගත් පාතාල සාමාජිකයා කෙසෙල්වත්තේ දිනුක නමැති පාතාල සාමාජිකයාගේ ගෝලයෙකු ලෙස කටයුතු කරන අයෙක් බව පොලිසිය කියයි.
එම පුද්ගලයාව ඝාතනයෙන් අනතුරුව රුපියල් දස දහසක මුදලක් ඝාතනය සැලසුම් කළ එකම පවුලේ සහෝදරයන් දෙදෙනාට ලබා දී ඇතැයි ද පොලිසිය පවසයි.
